जळगाव अपडेट न्यूज, निखिल वाणी I जिल्ह्यातील मुक्ताईनगर परिसरात वाढत्या मालमत्ता गुन्ह्यांना आळा घालण्यासाठी पोलिसांनी शुक्रवारी मध्यरात्री मोठे कोंबिंग ऑपरेशन राबवले. जिल्हा पोलीस अधीक्षक डॉ. महेश्वर रेड्डी यांच्या मार्गदर्शनाखाली झालेल्या या कारवाईत १५ फरार संशयितांना अटक करण्यात यश आले असून, ८२ तडीपार गुन्हेगारांची सखोल चौकशी करण्यात आली आहे.
ही कारवाई जळगाव येथील स्थानिक गुन्हे शाखा, मुक्ताईनगर पोलीस ठाणे आणि आरसीपी पथक यांच्या संयुक्त विद्यमाने करण्यात आली. मधापुरी, लालगोटा आणि हलखेडा या गावांमध्ये हे ऑपरेशन राबवण्यात आले. या विशेष मोहिमेत एका पोलीस निरीक्षकासह चार सहाय्यक निरीक्षक, उपनिरीक्षक, १३० पोलीस अंमलदार सहभागी झाले होते. कारवाईवर अपर पोलीस अधीक्षक अशोक नखाते आणि उपविभागीय पोलीस अधिकारी सुभाष ढवळे यांनी देखरेख ठेवली.
दरम्यान, मुक्ताईनगर पोलिसांनी दाखल गुन्ह्यातील फरार संशयित कमलेश्वर ज्ञानेश्वर पाटील (४५) आणि दीपमाला कमलेश पाटील (३८) (दोघे रा. मधापुरी) यांना अटक केली. याशिवाय चोरी, दरोडा अशा गुन्ह्यांमध्ये पूर्वी सहभागी असलेल्या १३ संशयितांविरुद्ध प्रतिबंधक कारवाई करण्यात आली. त्यामध्ये रोहित उर्फ गुरुदास पवार, क्रिश पवार, किसन पवार, नितेश पवार, आर्यमन पवार, गीता पवार (रा. मधापुरी) तसेच धरमसिंग, लखनसिंग, बाबुसिंग भोसले (रा. हलखेडा) आणि टोनी पवार, लकी पवार, सदानंद पवार (रा. लालगोटा) यांचा समावेश आहे.
स्थानिक स्वराज्य संस्था निवडणुकांच्या पार्श्वभूमीवर जळगाव पोलीस दलाने जिल्हाभरात ऑल आऊट ऑपरेशन आणि नाकाबंदी मोहीम देखील राबवली. यात २६९ अधिकारी-अंमलदार सहभागी झाले होते. या मोहिमेदरम्यान २,४५८ वाहनांची तपासणी, १४८ प्रलंबित वॉरंटची अंमलबजावणी तसेच १३५ हॉटेल्स आणि लॉजची तपासणी करण्यात आली.
विशेष मोहिमेत
दारूबंदी कायद्यांतर्गत : ९० गुन्हे
जुगार प्रतिबंधक कायद्यान्वये : ३४ गुन्हे
शस्त्र कायद्यान्वये : १ गुन्हा
अंमली पदार्थविरोधी कायदा : २२ गुन्हे
महाराष्ट्र पोलीस कायदा कलम १२२ अंतर्गत : १४ गुन्हे अशी नोंद घेण्यात आली आहे.
तसेच मोटार वाहन कायद्यांतर्गत ६७१ कारवाया करून तब्बल ₹५,१०,३५० दंड वसूल करण्यात आला आहे. जळगाव जिल्ह्यातील वाढत्या गुन्हेगारीवर नियंत्रण ठेवण्यासाठी अशा धडक मोहिमा पुढेही सुरू ठेवण्यात येणार असल्याची माहिती पोलीस प्रशासनाने दिली आहे.
टिप्पणी पोस्ट करा