जळगाव अपडेट न्यूज, निखिल वाणी I नशिराबाद–जळगाव रस्त्यावर चिरमाडे येथील पेट्रोल पंपाजवळ सोमवारी सायंकाळी सुमारे सात वाजण्याच्या सुमारास एक गंभीर अपघात घडला. वेगात असलेल्या कारने समोरून येणाऱ्या मालवाहू वाहनाला जोरदार धडक दिल्याने हा अपघात झाला. या घटनेत कारमधील दोन जण गंभीर जखमी झाले असून, त्यांच्यावर जळगाव शासकीय वैद्यकीय महाविद्यालय व रुग्णालयात उपचार सुरू आहेत.
भुसावळकडून जळगावच्या दिशेने येणारी मारुती बलेनो कार (एमएच-१९ सीव्ही ६३८७) आणि जळगावहून अमरावतीकडे खजूर वाहतूक करणारे महेंद्र पिकअप वाहन यांच्यात ही धडक झाली. अपघाताची तीव्रता इतकी होती की धडकेनंतर कार रस्त्याच्या कडेला फेकली जाऊन अनेक वेळा पलटी झाली. सुदैवाने कारमधील एअरबॅग उघडल्यामुळे जीवितहानी टळली, मात्र प्रवाशांना गंभीर दुखापती झाल्या.
दरम्यान, धडकेनंतर मालवाहू पिकअप वाहन रस्त्यावरील दुभाजकावर चढले. या अपघातामुळे जळगाव–नशिराबाद मार्गावरील वाहतूक काही काळ विस्कळीत झाली होती. दोन्ही बाजूंनी वाहनांच्या रांगा लागल्या होत्या. घटनास्थळी उपस्थित नागरिकांनी तत्काळ मदतीस धाव घेत जखमींना कारमधून बाहेर काढून रुग्णालयात रवाना केले.
या भागात तरसोद बायपासकडील सर्व्हिस रोडचे काम सुरू असून डाव्या बाजूची वाहतूक बंद असल्याने एकाच बाजूने वाहने सुरू होती. याच कारणामुळे अपघात झाल्याचा प्राथमिक अंदाज व्यक्त केला जात आहे. या घटनेची नोंद उशिरापर्यंत नशिराबाद पोलीस ठाण्यात झालेली नव्हती.
टिप्पणी पोस्ट करा