जळगाव अपडेट न्यूज, निखिल वाणी I शहरातील प्रसिद्ध मेहरुण तलावात बुडून रामेश्वर कॉलनी परिसरात राहणाऱ्या एका प्रौढाचा मृत्यू झाल्याची दुर्दैवी घटना शुक्रवारी (दि. ७ नोव्हेंबर) दुपारी तीनच्या सुमारास उघडकीस आली. मृताचे नाव प्रकाश राजकमल कांबळे (वय ४८) असे असून, त्यांच्या निधनाने परिसरात हळहळ व्यक्त केली जात आहे.
मिळालेल्या माहितीनुसार, प्रकाश कांबळे हे मजुरी करून उपजीविका करत होते. शुक्रवारी दुपारी ते घराबाहेर पडले होते. काही वेळानंतर स्थानिक नागरिकांना मेहरुण तलावाच्या पाण्यात एका व्यक्तीचा मृतदेह तरंगताना दिसला. हे पाहताच नागरिकांनी तत्काळ एमआयडीसी पोलिसांना माहिती दिली.
घटनेची माहिती मिळताच पोलिस तत्काळ घटनास्थळी दाखल झाले. स्थानिक पोहणाऱ्यांच्या मदतीने कांबळे यांचा मृतदेह तलावातून बाहेर काढण्यात आला. त्यानंतर मृतदेह जिल्हा शासकीय वैद्यकीय महाविद्यालय व रुग्णालयात दाखल करण्यात आला, मात्र तेथे वैद्यकीय अधिकाऱ्यांनी तपासणीअंती त्यांना मृत घोषित केले.
या घटनेनंतर रामेश्वर कॉलनी परिसरात तसेच मेहरुण तलाव परिसरात हळहळ व्यक्त करण्यात येत आहे. प्रकाश कांबळे यांच्या पश्चात पत्नी, मुलगा आणि विवाहित मुलगी असा परिवार आहे.
दरम्यान, या घटनेची अकस्मात मृत्यूची नोंद एमआयडीसी पोलिस ठाण्यात करण्यात आली असून, पोलीस पुढील तपास करत आहेत.
टिप्पणी पोस्ट करा