जळगाव अपडेट न्यूज, निखिल वाणी I बसमध्ये चढत असताना प्रवाशाच्या खिशातील ₹१५,000 रोख रक्कम चोरून फरार झालेल्या तीन पाकीटमारांना MIDC पोलिसांनी अवघ्या काही दिवसांत गजाआड केले आहे. त्यांच्या ताब्यातून चोरीस गेलेली संपूर्ण रक्कमही हस्तगत करण्यात आली आहे.
मिळालेल्या माहितीनुसार, यावल तालुक्यातील रहिवासी शेख कलीम शेख इसाक (वय ५०) हे ०१ डिसेंबर रोजी पत्नीच्या उपचारासाठी जळगाव येथे आले होते. उपचार आटोपून घरी जाण्यासाठी ते अजिंठा चौफुली बसस्थानकातून बसमध्ये चढत असतानाच मागून आलेल्या एका अनोळखी व्यक्तीने त्यांच्या पॅन्टच्या खिशातील रोकड चोरली. याप्रकरणी MIDC पोलीस ठाण्यात अज्ञात चोरट्याविरुद्ध गुन्हा दाखल करण्यात आला होता.
घटनेचे गांभीर्य ओळखून पोलीस निरीक्षक बबन आव्हाड यांनी गुन्हे शोध पथकाला तात्काळ तपासाचे आदेश दिले. पथकातील अंमलदारांनी सीसीटीव्ही फुटेज तसेच गुप्त माहितीच्या आधारे आरोपींचा माग काढला. तपासादरम्यान रजा कॉलनी परिसरातील तीन तरुणांची गुन्ह्यातील स्पष्ट भूमिका उघडकीस आली.
पोलिसांनी अटक केलेल्या आरोपींची नावे अशी :
हमीद अय्यूब खान (वय २२, रा. अक्सा नगर, बाम्बे बेकरी परिसर, जळगाव)
समीर खान अफसर खान (वय २२, रा. शेरा चौक, जळगाव)
शोहेब मेहमूद पटेल (वय २३, रा. रजा कॉलनी, शेरा चौक, जळगाव)
तिघांकडून चोरीस गेलेली ₹१५,००० रोख रक्कम पूर्णपणे जप्त करण्यात आली आहे.
ही कारवाई पोलीस अधीक्षक महेश्वर रेड्डी, अप्पर पोलीस अधीक्षक अशोक नखाते, उप विभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली. पथकात पोउपनि राहुल तायडे, पोउपनि चंद्रकांत धनके, सफौ विजयसिंग पाटील, तसेच किरण पाटील, गिरीष पाटील, प्रदीप चौधरी, विशाल कोळी यांचा समावेश होता. पुढील तपास पोहेकॉ गिरीष पाटील करीत आहेत.
टिप्पणी पोस्ट करा