मालेगावनंतर जळगाव पोलिसांची कारवाई, न्यायालयाकडून २९ डिसेंबरपर्यंत पोलीस कोठडी
जळगाव अपडेट न्यूज, निखिल वाणी I जळगाव जिल्ह्यासह राज्यभर गाजलेल्या एमडी ड्रग्स तस्करी प्रकरणातील मुख्य सूत्रधार मानला जाणारा शेख अबरार शेख मुख्तार उर्फ अबरार कुरेशी याला अखेर जळगाव पोलिसांनी ताब्यात घेतले आहे. मालेगाव येथे अटक झाल्यानंतर तेथील पोलीस कोठडी संपल्यावर जळगाव शहर पोलिसांनी त्याला ताब्यात घेत न्यायालयात हजर केले असता न्यायालयाने त्याला २९ डिसेंबरपर्यंत पोलीस कोठडी सुनावली आहे.
मिळालेल्या माहितीनुसार, जळगाव शहर पोलीस ठाण्यात दाखल असलेल्या एमडी ड्रग्स तस्करी प्रकरणात शेख अबरार हा प्रमुख संशयित आरोपी असून तो गेल्या अनेक महिन्यांपासून पोलिसांना गुंगारा देत होता. त्याचा शोध घेण्यासाठी जळगाव पोलीस विविध पातळ्यांवर तपास करत होते. दरम्यान, काही दिवसांपूर्वी मालेगाव विशेष पोलीस पथकाने त्याला अटक केली होती.
मालेगावमध्ये झालेल्या कारवाईदरम्यान अबरारकडून सुमारे ६० ग्रॅम एमडी पावडर जप्त करण्यात आली होती. मात्र, त्याच्यासोबत असलेले इतर दोन साथीदार घटनास्थळावरून पळून जाण्यात यशस्वी झाले होते. या प्रकरणात त्याला मालेगाव न्यायालयाने पोलीस कोठडी सुनावली होती. ती मुदत संपल्यानंतर त्याला न्यायालयीन कोठडीत ठेवत नाशिक कारागृहात रवानगी करण्यात आली होती.
दरम्यान, जळगाव शहर पोलीस ठाण्यात दाखल असलेल्या गुन्ह्यातील तपासासाठी जळगाव पोलिसांनी अबरार याचा ताबा घेतला. त्याला जिल्हा न्यायालयात हजर केले असता, न्यायालयाने त्याला पाच दिवसांची पोलीस कोठडी सुनावली आहे. या काळात एमडी ड्रग्सच्या पुरवठा साखळी, इतर आरोपी, तसेच आर्थिक व्यवहारांचा तपास करण्यात येणार आहे.
या कारवाईमुळे जळगाव जिल्ह्यातील अमली पदार्थ तस्करीच्या जाळ्याला मोठा धक्का बसला असून, पुढील तपासात आणखी धक्कादायक माहिती समोर येण्याची शक्यता वर्तवली जात आहे. जळगाव पोलिसांकडून या प्रकरणाचा सखोल तपास सुरू असून फरार आरोपींचा शोधही वेगाने सुरू आहे.
टिप्पणी पोस्ट करा