जळगाव अपडेट न्यूज, निखिल वाणी I एरंडोल येथील महसूल विभागातील आणि सध्या धरणगाव तहसील कार्यालयात लिपिक म्हणून कार्यरत असलेल्या शिवाजी रघूनाथ महाजन (वय ४२, रा. अष्टविनायक कॉलनी) यांचा २० नोव्हेंबर रोजी सकाळी झालेल्या भीषण अपघातात दुर्दैवी मृत्यू झाला. मॉर्निंग वॉकसाठी गेलेल्या महाजन यांना मागून भरधाव वेगाने येणाऱ्या डंपरने जोरदार धडक दिल्याने ते जागीच ठार झाले. या घटनेमुळे एरंडोल व धरणगाव परिसरात शोककळा पसरली आहे.
मिळालेल्या माहितीनुसार, महाजन हे नेहमीप्रमाणे सकाळी आपल्या परिचितांसोबत एरंडोल–पारोळा महामार्गावर चालण्यासाठी गेले होते. सकाळी सुमारे ६.४५ वाजता रघुवीर समर्थक बैठक हॉलसमोरील सर्विस रोडवरून शहराकडे परतत असताना एचआर–३८ एडी–४१३६ क्रमांकाच्या डंपरने त्यांना मागून जोरदार धडक दिली. धडक इतकी भीषण होती की त्यांचा डंपरच्या चाकाखाली सापडून घटनास्थळीच मृत्यू झाला.
अपघाताची माहिती मिळताच हे.कॉ. राजेश पाटील, अमोल भोसले व विजय पाटील यांनी तातडीने घटनास्थळी धाव घेतली. घटनानंतर डंपर चालक वाहन सोडून फरार झाला असून पोलिसांनी डंपर जप्त करून पोलीस ठाण्यात आणले आहे. महाजन यांच्या पश्चात पत्नी, ५ वर्षांचा मुलगा आणि ११ वर्षांची मुलगी असा परिवार आहे. एरंडोल ग्रामीण रुग्णालयात त्यांच्या मृतदेहाचे शवविच्छेदन करण्यात आले.
अपघातात सामील डंपर हा एरंडोल–धरणगाव रस्त्याच्या कामासाठी मुरुम वाहतूक करत असल्याची माहिती मिळाली. तसेच महामार्ग प्राधिकरणाच्या हलगर्जीपणामुळे या मार्गावर अनेक अपघात घडत असल्याची नागरिकांनी संतापाने प्रतिक्रिया व्यक्त केली. या प्रकरणी सुरेश लक्ष्मण पारखे यांच्या फिर्यादीवरून डंपर चालकाविरुद्ध एरंडोल पोलीस ठाण्यात गुन्हा दाखल करण्यात आला असून तपास हे.कॉ. किरण पाटील करत आहेत.
टिप्पणी पोस्ट करा