जळगाव अपडेट न्यूज, निखिल वाणी I जागतिक बुद्धिबळ संघटना (फिडे) आणि अखिल भारतीय बुद्धिबळ महासंघ (AICF) यांच्या संयुक्त विद्यमाने, तसेच गोवा शासनाच्या सहकार्याने विश्वचषक बुद्धिबळ स्पर्धेचे आयोजन तब्बल दोन दशकांनंतर भारतात होत आहे. ही प्रतिष्ठेची स्पर्धा ३१ ऑक्टोबर ते २७ नोव्हेंबरदरम्यान गोव्यात पार पडणार आहे.
या जागतिक स्पर्धेत जळगावचा जैन स्पोर्ट्स अकॅडमीचा आंतरराष्ट्रीय पंच प्रवीण ठाकरे यांची सामना सहाय्यक पंच (Arbiter) म्हणून निवड करण्यात आली आहे. ही नियुक्ती थेट जागतिक बुद्धिबळ संघटना (FIDE) तर्फे करण्यात आली असून, उत्तर महाराष्ट्रातून विश्वचषक बुद्धिबळ स्पर्धेत निवड होणारे प्रवीण ठाकरे हे पहिलेच पंच ठरले आहेत.
प्रवीण ठाकरे यांनी यापूर्वी अनेक राज्य, राष्ट्रीय, आशियाई आणि वर्ल्ड ज्युनियर बुद्धिबळ स्पर्धांमध्ये पंच म्हणून यशस्वीपणे काम केले आहे. त्यांच्या या निवडीबद्दल अखिल भारतीय बुद्धिबळ संघाचे सल्लागार तथा जैन इरिगेशन सिस्टीम्स लि.चे अध्यक्ष अशोक जैन आणि सहव्यवस्थापकीय संचालक अतुल जैन यांनी त्यांचा विशेष सत्कार करून शुभेच्छा दिल्या. तसेच महाराष्ट्र बुद्धिबळ संघटनेचे अध्यक्ष डॉ. परिणय फुके, कार्याध्यक्ष सिद्धार्थ मयूर, ग्रँडमास्टर अभिजीत कुंटे, उपाध्यक्ष गिरीश चितळे, नरेंद्र फिरोदिया, विनय बेले, पी. बी. भिलारे, सचिव निरंजन गोडबोले आदींनीही प्रोत्साहन व मार्गदर्शन केले.
दर दोन वर्षांनी होणाऱ्या या बुद्धिबळ महासंग्रामात ८० हून अधिक देशांचे प्रतिनिधी आणि २०६ खेळाडू सहभागी होत आहेत. बाद फेरी प्रणालीवर आधारित या खुल्या गटातील सामन्यांमुळे रोमहर्षक आणि उत्कंठावर्धक लढती पाहायला मिळणार आहेत.
भारताकडून डी. गुकेश, प्रग्नानंदा, अर्जुन इरिगेसी, विदित गुजराथी, अरविंद चिदंबरम आणि दिव्या देशमुख यांसारखे आघाडीचे खेळाडू आपले कौशल्य दाखवणार आहेत. तर परदेशी खेळाडूंमध्ये अनिश गिरी, वेस्ली सो, नोदरबेक अब्दुसत्तारोव, इयान नेपोमियाशी, व्हिन्सेंट केमर आणि लियोन आरोनियन यांसारखे नामवंत बुद्धिबळपटू सहभागी होत आहेत.
या प्रतिष्ठेच्या स्पर्धेतील खेळाडू, प्रशिक्षक, व्यवस्थापक आणि पंच यांच्या उत्तम सोयी-सुविधांची व्यवस्था अखिल भारतीय बुद्धिबळ महासंघ आणि गोवा शासनाकडून करण्यात आली आहे.
जळगाव जिल्ह्यातील प्रवीण ठाकरे यांना या जागतिक दर्जाच्या स्पर्धेत सहाय्यक पंच म्हणून संधी मिळाल्याने महाराष्ट्रातील बुद्धिबळ क्षेत्रासाठी हा अभिमानाचा क्षण ठरला आहे.
त्यांच्या या यशाबद्दल जळगाव जिल्हा बुद्धिबळ संघटनेचे अध्यक्ष अतुल जैन, सचिव नंदलाल गादिया, तसेच फारुक शेख, अंजली कुलकर्णी, चंद्रशेखर देशमुख, पद्माकर करणकर, शकील देशपांडे, आर. के. पाटील, नरेंद्र पाटील, संजय पाटील, यशवंत देसले, तेजस तायडे, तसेच जैन स्पोर्ट्स अकॅडमीचे अरविंद देशपांडे आणि रवींद्र धर्माधिकारी यांनी प्रवीण ठाकरे यांना पुढील वाटचालीसाठी शुभेच्छा दिल्या.
टिप्पणी पोस्ट करा