जळगाव अपडेट न्यूज, निखिल वाणी I
जळगाव जिल्ह्यातील पारोळा तालुक्यातील उंदिरखेडे गावात एका २५ वर्षीय होतकरू अभिनेत्याने गळफास घेऊन आत्महत्या केल्याची हृदयद्रावक घटना घडली आहे. सचिन गणेश चांदवडे (वय २५) असे या तरुणाचे नाव असून, तो ‘जमतारा २’ आणि ‘असुरवन’ या कलाकृतींमध्ये झळकणार होता. त्याच्या आकस्मिक निधनामुळे उंदिरखेडे गावावर तसेच संपूर्ण तालुक्यात शोककळा पसरली आहे.
सचिन चांदवडे हा स्वप्नाळू आणि होतकरू अभिनेता म्हणून ओळखला जात होता. अभिनयाची आवड जोपासत असतानाच तो पुण्यातील आयटी पार्कमध्ये सॉफ्टवेअर इंजिनीअर म्हणून कार्यरत होता. कामासोबतच तो अभिनयाच्या क्षेत्रात आपले वेगळे स्थान निर्माण करण्याचा प्रयत्न करत होता. काही दिवसांपूर्वीच त्याने दोन वेगवेगळ्या वेब सीरिजमध्ये भूमिका मिळवली होती, ज्यामुळे त्याच्या गावात आणि मित्रपरिवारात आनंदाचे वातावरण होते.
मात्र, २३ ऑक्टोबर रोजी दुपारी सुमारे दीडच्या सुमारास सचिनने आपल्या राहत्या घरात गळफास घेऊन जीवनयात्रा संपवली. कुटुंबीयांनी त्याला तातडीने उपचारासाठी रुग्णालयात हलवले, मात्र डॉक्टरांनी तपासणीअंती त्याला मृत घोषित केले. या घटनेची माहिती मिळताच पोलिसांनी घटनास्थळी धाव घेत पंचनामा केला.
सचिनच्या आत्महत्येचे कारण अद्याप स्पष्ट झालेले नाही. पोलिस तपास सुरू असून मोबाईल तपासणी व मित्रपरिवाराकडून चौकशी केली जात आहे. दरम्यान, गावातील या प्रतिभावान तरुणाच्या निधनाने सर्वत्र हळहळ व्यक्त होत आहे. सामाजिक माध्यमांवर सचिनच्या आठवणींना उजाळा देत मित्रपरिवाराने श्रद्धांजली वाहिली आहे.
स्थानिकांच्या मते, सचिन हा अत्यंत नम्र, शांत स्वभावाचा आणि मेहनती तरुण होता. त्याने आपल्या कलागुणांच्या जोरावर मनोरंजन क्षेत्रात नाव कमावण्याचे स्वप्न पाहिले होते. पण त्याचे हे स्वप्न पूर्ण होण्याआधीच त्याने जगाचा निरोप घेतल्याने उंदिरखेडे गावात शोककळा पसरली आहे.
टिप्पणी पोस्ट करा