नवी दिल्ली, निखिल वाणी I राष्ट्रपती भवनात मंगळवारी पार पडलेल्या भव्य सोहळ्यात राष्ट्रपती द्रौपदी मुर्मू यांच्या हस्ते देशातील 68 मान्यवरांना पद्म पुरस्कार प्रदान करण्यात आले. या सोहळ्याला उपराष्ट्रपती जगदीप धनखड, पंतप्रधान नरेंद्र मोदी, तसेच केंद्रीय गृहमंत्री अमित शहा यांची उपस्थिती लाभली होती.
या वर्षीच्या पद्म पुरस्कारांमध्ये पद्मविभूषण, पद्मभूषण आणि पद्मश्री या तिन्ही श्रेणींतील पुरस्कार समाविष्ट होते. 76 व्या प्रजासत्ताक दिनाच्या पूर्वसंध्येला, म्हणजेच 25 जानेवारी रोजी, सरकारकडून एकूण 139 प्रतिष्ठित व्यक्तींची नावे जाहीर करण्यात आली होती. या नामांकन यादीत कला, साहित्य, समाजसेवा, विज्ञान, वैद्यकीय क्षेत्र, शिक्षण, उद्योग, क्रीडा आणि सार्वजनिक जीवनातील विविध क्षेत्रांत कार्यरत व्यक्तींचा समावेश होता.
या यादीतील 68 व्यक्तींना मंगळवारी झालेल्या दुसऱ्या टप्प्यात सन्मानित करण्यात आले. या पुरस्कार सोहळ्यात मनोरंजन क्षेत्रातील काही दिग्गजांनाही गौरवण्यात आले. महाराष्ट्रासाठी विशेष सन्मानाची बाब म्हणजे, अभिनय सम्राट अशोक सराफ यांना यावर्षी पद्मश्री पुरस्काराने सन्मानित करण्यात आले. त्यांना हा पुरस्कार राष्ट्रपती मुर्मू यांच्या हस्ते प्रदान करण्यात आला.
अशोक सराफ यांनी गेल्या चार दशकांहून अधिक काळ आपल्या बहुआयामी अभिनयाने मराठी आणि हिंदी सिनेसृष्टी गाजवली आहे. विनोदी भूमिकांपासून ते भावनिक व्यक्तिरेखांपर्यंत सर्वच स्वरूपाच्या भूमिकांमध्ये त्यांनी रसिक प्रेक्षकांचे मन जिंकले आहे. 'महाराष्ट्र भूषण' पुरस्काराने यापूर्वीच सन्मानित झालेल्या या दिग्गज अभिनेत्याला आता पद्मश्री पुरस्कार प्राप्त झाल्याने मराठी चित्रपटसृष्टीतील चाहत्यांमध्ये आनंदाची लाट उसळली आहे.
देशभरातील विविध क्षेत्रांतील प्रतिभावान व्यक्तींच्या योगदानाचा गौरव करणारा हा पद्म पुरस्कार सोहळा नेहमीच प्रेरणादायी ठरतो. राष्ट्रपती मुर्मू यांनी आपल्या भाषणात पुरस्कार विजेत्यांचे अभिनंदन करताना सांगितले की, “ही सर्व मंडळी समाजात परिवर्तन घडवून आणणारे खरे हिरो आहेत. त्यांचे योगदान नव्या पिढीसाठी दीपस्तंभासारखे आहे.”
हा पुरस्कार सोहळा पुन्हा एकदा देशातील असंख्य नागरिकांसाठी प्रेरणेचा स्रोत ठरला असून विविध क्षेत्रांतील गुणवत्तेची ओळख आणि गौरव करणारा एक महत्त्वाचा टप्पा ठरला आहे.
टिप्पणी पोस्ट करा