जळगाव अपडेट न्यूज, निखिल वाणी I जळगाव जिल्हा पुन्हा एकदा गोळीबाराच्या घटनेने हादरला आहे. एरंडोल तालुक्यातील खेडी कढोली गावात सोमवारी (३ नोव्हेंबर) दुपारी साडेचारच्या सुमारास गावठी पिस्तूल हातातून चुकून सुटलेल्या गोळीने एक तरुण गंभीर जखमी झाल्याची धक्कादायक घटना घडली आहे. बंदूक हाताळत असताना ही दुर्घटना घडल्याची प्राथमिक माहिती समोर आली आहे.
जखमी झालेल्या तरुणाचे नाव सोनू सुभाष बडगुजर (रा. खेडी कढोली, ता. एरंडोल) असे असून, गोळीबार करणारा त्याचा मित्र जितेंद्र किशोर कोळी (रा. खेडी कढोली, ता. एरंडोल) असल्याचे पोलिस तपासातून स्पष्ट झाले आहे.
मिळालेल्या माहितीनुसार, सोमवार दुपारी साडेचारच्या सुमारास गावातील भर चौकात सोनू बडगुजर आणि जितेंद्र कोळी हे दोघे आपापसात मस्करी करत उभे होते. याचवेळी जितेंद्र कोळीच्या हातात असलेले गावठी पिस्तूल तो सहज हाताळत असताना अचानक ट्रिगर दाबला गेला आणि बंदुकीची गोळी सुटली.
ही गोळी थेट सोनू बडगुजरच्या छातीच्या खांद्याच्या भागात जाऊन घुसली आणि तेथेच अडकली. गोळी लागल्याने सोनू गंभीर जखमी झाला असून, घटनास्थळी काही क्षणांतच गोंधळ उडाला. स्थानिकांनी तत्काळ जखमी सोनूला प्राथमिक उपचारांनंतर जळगाव शासकीय वैद्यकीय महाविद्यालय व रुग्णालयात हलविले असून, त्याच्यावर उपचार सुरू आहेत.
या घटनेमुळे खेडी कढोली गावात भीतीचे आणि खळबळीचे वातावरण निर्माण झाले आहे. दरम्यान, एरंडोल पोलिस ठाण्याचे पथक घटनास्थळी दाखल झाले असून, या प्रकरणाचा सखोल तपास सुरू आहे. पोलिसांकडून पिस्तूल कुठून आले, ते परवाना असलेले आहे का, आणि नेमकी ही दुर्घटना कशी घडली याचा तपास सुरू आहे.
टिप्पणी पोस्ट करा