जळगाव अपडेट न्यूज, निखिल वाणी I चोपडा तालुक्यातील चुंचाळे येथे कृषी विभागाच्या जिल्हा भरारी पथकाने मोठी कारवाई करत सुमारे १७ लाख ८२ हजार २०० रुपये किंमतीचे बनावट HTBT कापूस बियाणे जप्त केले आहे. या प्रकरणी संशयित आरोपी नितीन नंदलाल चौधरी याच्यावर विविध कायद्यांच्या अधीन राहून गुन्हा दाखल करण्यात आला आहे.
ही कारवाई गोपनीय माहितीच्या आधारे करण्यात आली. विभागीय कृषी सहसंचालक सुभाष काटकर, जिल्हा अधीक्षक कृषी अधिकारी कुर्बान तडवी, कृषी विकास अधिकारी पद्मनाभ म्हस्के, पोलिस निरीक्षक मधुकर साळवे व पोलिस निरीक्षक कावेरी कमलाकर यांच्या मार्गदर्शनाखाली ही मोहीम आखण्यात आली होती.
जिल्हा भरारी पथकातील जिल्हा गुण नियंत्रण निरीक्षक विकास बोरसे, जिल्हा मोहीम अधिकारी विजय पवार, कृषी अधिकारी किरण पाटील, पोलिस कॉन्स्टेबल विशाल पाटील, विद्या इंगळे, प्रकाश मथुरे व समा तडवी यांनी संयुक्तरित्या ही कारवाई केली. त्यांनी चुंचाळे-अक्कुलखेडा रस्त्यावरील एका पत्र्याच्या शेडवर छापा टाकून १२७३ पाकिटे प्रतिबंधित बियाणे जप्त केले.
या बियाण्यांची एकूण किंमत १७,८२,२०० रुपये इतकी असून, बियाणे कायदा, बियाणे नियम, अत्यावश्यक वस्तू अधिनियम, महाराष्ट्र कापूस बियाणे अधिनियम आणि पर्यावरण संरक्षण अधिनियम अंतर्गत गुन्हा दाखल करण्यात आला आहे.
या प्रकरणी जिल्हा गुण नियंत्रण निरीक्षक विकास बोरसे यांनी फिर्याद दाखल केली असून पुढील तपास पोलिस उपनिरीक्षक जितेंद्र वल्टे हे करत आहे.
टिप्पणी पोस्ट करा