जळगाव अपडेट न्यूज, निखिल वाणी I शहरातील विविध भागांतून दुचाकी चोरीच्या घटना सातत्याने घडत असताना, एमआयडीसी पोलिसांनी सिंधी कॉलनी परिसरातील चोरीस गेलेल्या दुचाकीसह अन्य ठिकाणांहून चोरीस गेलेल्या दुचाकींचा छडा लावत दोन सराईत गुन्हेगारांना अटक केली आहे. शनीपेठ परिसरातून त्यांना बुधवारी (४ मार्च) दुपारी २ वाजता अटक करण्यात आली. त्यांच्या ताब्यातून १ लाख ४० हजार रुपये किमतीच्या दोन दुचाकी जप्त करण्यात आल्या आहेत.
सीसीटीव्ही फुटेजच्या आधारे आरोपींना अटक
शहरातील केमिस्ट भवन परिसरातील रहिवासी यश मनोहरलाल अहुजा (वय २४) यांनी ३१ मार्च रोजी सिंधी कॉलनी सेवामंडळ परिसरातून त्यांची सीबी झेड मोटारसायकल (एम.एच. १९ बीए १७३७) चोरीला गेल्याची तक्रार दाखल केली होती. या तक्रारीनंतर एमआयडीसी पोलीस ठाण्याचे पोलीस निरीक्षक संदीप पाटील यांच्या मार्गदर्शनाखाली गुन्हे शोध पथकाने तपासाला सुरुवात केली.
तपासादरम्यान, पोलिसांनी परिसरातील सीसीटीव्ही फुटेज तपासले. यात दोन व्यक्ती दुचाकी चोरताना स्पष्टपणे दिसून आल्या. या फुटेजच्या आधारे तपास करत पोलिसांनी शनिपेठ पोलीस ठाण्याच्या रेकॉर्डवरील सराईत गुन्हेगार आकाश संजय मराठे आणि माधव श्रावण बोराडे या दोघांना शनिपेठ परिसरातून अटक केली.
दोन दुचाकींसह १.४० लाख रुपयांचा मुद्देमाल जप्त
अटक करण्यात आलेल्या दोघा आरोपींकडून पोलिसांनी १ लाख ४० हजार रुपये किमतीच्या दोन दुचाकी जप्त केल्या आहेत. यात तक्रारदार अहुजा यांची सीबी झेड मोटारसायकल (एम.एच. १९ बीए १७३७) तसेच जळगाव शहर पोलीस ठाण्यात दाखल असलेल्या अन्य एका गुन्ह्यातील हिरो एचएफ डिलक्स मोटारसायकल (एम.एच. १९ बीटी ६९४५) यांचा समावेश आहे.
या प्रकरणाचा पुढील तपास एमआयडीसी पोलीस करीत असून, आरोपींनी याआधीही अशा प्रकारचे गुन्हे केले आहेत का, याचा तपास सुरू आहे. पोलिसांच्या या कारवाईमुळे शहरातील दुचाकी चोरीच्या घटनांना आळा बसण्यास मदत होणार आहे.
टिप्पणी पोस्ट करा