नयनतारा मॉलमधील दुकानावर एलसीबी, शहर पोलिसांची संयुक्त कारवाई; हरियाणातील व्यावसायिकावर गुन्हा दाखल
जळगाव अपडेट न्यूज निखिल वाणी I शहरातील गोविंदा रिक्षा स्टॉपजवळील नयनतारा ऑर्किड मॉलमध्ये चालविण्यात येणाऱ्या मसाज पार्लरच्या आड अनैतिक व्यवसाय सुरू असल्याची माहिती स्थानिक गुन्हे शाखेला (एलसीबी) मिळाल्यानंतर त्यांनी शहर पोलिसांच्या सहकार्याने मोठी कारवाई केली. या कारवाईत चार महिलांची सुटका करण्यात आली असून एकाला अटक करण्यात आली आहे. तसेच हरियाणातील एकावर गुन्हा दाखल करण्यात आला आहे.
गोविंदा रिक्षा स्टॉपजवळील नयनतारा मॉलमधील दुकान क्रमांक ४०८ मध्ये मसाज पार्लरच्या नावाखाली अनैतिक व्यवसाय सुरू असल्याची गोपनीय माहिती एलसीबीला मिळाली होती. त्यानुसार बनावट ग्राहक पाठवून खात्री घेतल्यानंतर पोलिसांनी कारवाई केली. बनावट ग्राहकाला अतिरिक्त सेवा देण्याचे आमिष संशयित राजू मधुजी जाट (वय-अंदाजे, रा. कलोधिया, ता. पिंपरी, जि. भीलवाडा, राजस्थान) याने दिले. त्यानंतर पोलिसांनी तातडीने छापा टाकला.
या छाप्यात चौघी महिलांना मुक्त करण्यात आले असून, त्यांच्याकडून पाच केंद्रांद्वारे अनैतिक सेवा पुरवली जात असल्याचे आढळून आले. या संपूर्ण व्यवसायामागे विक्रम राजपाल चंदमारी धानी (वय २०, रा. चत्तरगढ पत्ती, जि. सिरसा, हरियाणा) हा प्रमुख सूत्रधार असल्याचे स्पष्ट झाले आहे. पोलिसांनी त्याच्यावर आणि राजू जाट यांच्यावर पिटा कायद्यानुसार गुन्हा दाखल केला आहे.
राजू जाट याला अटक करण्यात आली असून, चारही महिलांना आशादीप महिला वस्तीगृहात ठेवण्यात आले आहे.
ही कारवाई जळगाव शहर पोलीस स्टेशनचे निरीक्षक अनिल भवारी, सपोनी शितल कुमार नाईक, एलसीबीचे उपनिरीक्षक शरद बागल, महेश घायतळ, सहाय्यक फौजदार विजयसिंह पाटील, अतुल वंजारी, सुनील पाटील, अक्रम शेख, विजय पाटील, योगेश पाटील, महिला पोलीस उपनिरीक्षक वैशाली महाजन, हेडकॉन्स्टेबल प्रियंका कोळी, मंगला तायडे आणि चालक दीपक चौधरी यांच्या पथकाने केली.
टिप्पणी पोस्ट करा