जळगाव अपडेट न्यूज, निखिल वाणी I शहरातील महाबळ रस्त्यालगत असलेल्या अरुंधती अपार्टमेंटमध्ये आज दुपारी भरदिवसा घरफोडीची घटना घडली आहे. पब्लिक लाईव्ह पोर्टलचे संपादक काशिनाथ चव्हाण यांच्या बंद घराचे कुलूप तोडून चोरट्यांनी सोन्याचे दागिने, चांदी व रोकड असा एकूण ऐवज चोरून नेला आहे. या प्रकरणी रामानंद नगर पोलीस ठाण्यात गुन्हा दाखल करण्याचे काम सुरू आहे.
काशिनाथ चव्हाण हे कुटुंबीयांसह अरुंधती अपार्टमेंटच्या दुसऱ्या मजल्यावर वास्तव्यास आहेत. गुरुवारी, दिनांक १० एप्रिल २०२५ रोजी दुपारी एक वाजता त्यांच्या पत्नी दोन्ही मुलांना घेऊन अपार्टमेंटच्या बाजूला असलेल्या ब्युटी पार्लरमध्ये गेल्या होत्या. तेव्हा संधी साधून चोरट्यांनी अवघ्या अर्ध्या तासात घराचे मुख्य दरवाजाचे कुलूप तोडले आणि कपाट फोडून ७ ग्रॅम वजनाची सोन्याची चैन, ५ तोळ्याचे चांदीचे ब्रासलेट आणि सुमारे ८५ हजार रुपयांची रोकड लंपास केली.
चोरीनंतर जेव्हा चव्हाण यांच्या पत्नी घरी परतल्या, तेव्हा त्यांना दरवाजा उघडा आढळून आला. आतमध्ये गेल्यावर घरातील कपाटे उचकटलेली आणि सामान अस्ताव्यस्त दिसल्याने त्यांनी त्वरित रामानंद नगर पोलीस ठाण्याला माहिती दिली. घटनेची माहिती मिळताच पोलीस उपनिरीक्षक प्रदीप बोरुडे यांच्या नेतृत्वाखाली पोलीस पथक घटनास्थळी दाखल झाले असून, घरफोडीच्या ठिकाणी पंचनामा व पुढील तपास सुरू आहे.
दरम्यान, अपार्टमेंटमध्ये सीसीटीव्ही कॅमेरे कार्यान्वित असल्याची प्राथमिक माहिती असून, पोलिसांकडून फुटेजची तपासणी सुरू आहे. ही घटना भरदिवसा घडल्याने परिसरात भीतीचे वातावरण पसरले आहे.
टिप्पणी पोस्ट करा