आरोपींवर गुन्हा दाखल करण्याची नातेवाईकांची मागणी
जळगाव अपडेट न्यूज, निखिल वाणी I जळगाव शहरातील चंदूअण्णा नगरात राहणाऱ्या मुकेश अर्जुन पाटील (वय ३५) या तरुणाने खासगी सावकाराच्या पैशांसाठीच्या तगाद्याला आणि धमक्यांना कंटाळून आपल्या राहत्या घरी गळफास घेऊन आत्महत्या केल्याची धक्कादायक घटना बुधवारी (२७ मार्च) दुपारी १२ वाजेच्या सुमारास उघडकीस आली आहे. या घटनेमुळे परिसरात एकच खळबळ उडाली असून, आत्महत्येस प्रवृत्त करणाऱ्यांवर गुन्हा दाखल करून त्यांना अटक करण्याची मागणी मृताच्या नातेवाईकांनी केली आहे. याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
मुकेश अर्जुन पाटील हे चंदूअण्णा नगरात पत्नी आणि दोन मुलांसोबत वास्तव्यास होते. ते एम. जे. कॉलेज परिसरात आयएमपी कॉम्प्युटर इन्स्टिट्यूट चालवत होते. कोरोना काळात इन्स्टिट्यूट चालू ठेवण्यासाठी मुकेशने मोठ्या प्रमाणावर कर्ज घेतले होते. ओळखीच्या लवेश चव्हाण यांच्याकडून त्याने १ लाख २० हजार रुपये उसने घेतले होते, त्यापैकी ६५ हजार रुपये त्याने परतही केले होते. मात्र, उर्वरित रक्कम व्याजासह २ लाख ९५ हजार रुपयांवर पोहोचली होती. या रकमेच्या परतफेडीसाठी लवेश चव्हाण सतत तगादा लावत होता.
घटनेच्या दोन दिवस आधीच मुकेशने पत्नीला माहेरी पाठवले होते, त्यामुळे मुकेश घरी एकटाच होता. २६ मार्च रोजी सकाळी ११ वाजता लवेश चव्हाण आणि त्याचे ४-५ साथीदार मुकेशच्या घरी आले. त्यांनी मुकेशला शिवीगाळ करत धमकावले आणि त्याची दुचाकी जबरदस्तीने हिसकावून नेली. या प्रकारामुळे मुकेश मानसिक तणावात गेला आणि त्याने दुपारी १२ वाजता आपल्या राहत्या घरी गळफास घेऊन आत्महत्या केली.
मुकेशच्या पत्नीने त्याला वारंवार फोन केला, मात्र प्रतिसाद न मिळाल्याने तिने शेजाऱ्यांना कळवले. शेजाऱ्यांनी खिडकीतून पाहिले असता, मुकेशने गळफास घेतल्याचे लक्षात आले. तातडीने पोलिसांना आणि कुटुंबीयांना बोलावण्यात आले. घटनेची माहिती मिळताच कुटुंबीय आणि नातेवाईकांनी जिल्हा शासकीय वैद्यकीय महाविद्यालयात धाव घेतली. त्यांनी मोठ्या आवाजात आक्रोश करत, आत्महत्येस प्रवृत्त करणाऱ्यांवर कठोर कारवाई करण्याची मागणी केली. "जोपर्यंत आरोपींवर गुन्हा दाखल होत नाही, तोपर्यंत मृतदेह ताब्यात घेणार नाही," असा पवित्रा कुटुंबीयांनी घेतला आहे.
जळगाव तालुका पोलिसांनी या घटनेची नोंद घेतली असून, ते या प्रकरणाचा अधिक तपास करत आहेत. आरोपी लवेश चव्हाण आणि त्याच्या साथीदारांना पकडण्यासाठी पोलिसांनी पथके तयार केली असून, लवकरच त्यांना अटक करण्यात येईल, असे पोलिसांनी सांगितले.
टिप्पणी पोस्ट करा