अन्न सुरक्षा आयुक्ताच्या मार्गदर्शनाखाली १४ दूध ब्रॅण्डचे नमुने घेण्यात आले, भेसळविरोधी विशेष मोहिमेत ४०९५ रुपयांचा मुदतबाह्य साठा नष्ट
जळगाव अपडेट न्यूज, निखिल वाणी I मुख्यमंत्री देवेंद्र फडणवीस यांच्या संकल्पनेतील 100 दिवसांचा कृति आराखडा घोषित केल्यानंतर अन्न सुरक्षा आयुक्त, अन्न व औषध प्रशासन, महाराष्ट्र राज्याने 13 जानेवारी 2025 रोजी दुरदर्शन प्रणालीद्वारे घेतलेल्या बैठकीत अन्न व्यावसायिकांचे परवाने/नोंदणी, धडक मोहिम, दूध व दुग्धजन्य पदार्थांचे नमुने, Fostac Training, Hygiene Rating, Eat Right Campus यांची कार्यवाही प्रभावीपणे करण्याचे निर्देश दिले.
याच अनुषंगाने राज्यातील भेसळ रोखण्यासाठी तसेच जनतेला गुणवत्तापूर्ण दूध व दुग्धजन्य पदार्थ मिळवून देण्यासाठी राज्यभरात विशेष तपासणी आणि सर्वेक्षण मोहिम राबविण्यात येत आहे. अन्न सुरक्षा आयुक्त राजेश नार्वेकर, सह आयुक्त म.ना.चौधरी, जळगाव जिल्ह्याचे सहायक आयुक्त (अन्न) सं.कृ.कांबळे यांचे मार्गदर्शनाखाली या मोहिमेची कार्यवाही सुरु आहे.
आज दिनांक 15 जानेवारी 2025 रोजी जळगाव जिल्ह्यात विशेष मोहिम राबवली गेली. यामध्ये विविध अन्न आस्थापनांची तपासणी करण्यात आली आणि दुध व दुग्धजन्य पदार्थांच्या 14 ब्रॅण्डचे नमुने विश्लेषणासाठी घेतले. यासोबतच मे. रविराज एजन्सी, विसनजी नगर, जळगाव यांच्याकडे 4095/- रुपये किंमतीचे दूध व दुग्धजन्य पदार्थांच्या साठ्याचा आढळून आल्यामुळे तो मुदतबाह्य होता. जनहित आणि जनस्वास्थ्याच्या दृष्टीकोनातून, विक्रेता यांच्या समोरच हा साठा नष्ट करण्यात आला.
अन्न सुरक्षा व मानके कायदा 2006 अंतर्गत पुढील कार्यवाहीची प्रस्तावना तयार करण्यात आली आहे. यामध्ये अन्न सुरक्षा आयुक्त राजेश नार्वेकर, सह आयुक्त म.ना.चौधरी, सहायक आयुक्त सं.कृ.कांबळे, अन्न सुरक्षा अधिकारी कि.आ.साळुंके आणि श.म.पवार यांनी यशस्वीपणे ही कार्यवाही पार पाडली.
ही मोहिम राज्यभर राबवली जात असून, सर्व नागरिकांना गुणवत्तापूर्ण व भेसळविरहित अन्न मिळवून देण्याचे प्रशासनाचे प्रयत्न सुरू आहेत.
टिप्पणी पोस्ट करा