हृदयद्रावक! आईच्या कुशीतून दोन महिन्यांच्या बालिकेला बिबट्याने उचलले

जळगाव जिल्ह्यातील ३५ सीबीएसई शाळांमध्ये 'आरोग्य केंद्र' सुरू

जळगाव अपडेट न्यूज, निखिल वाणी I शालेय जीवनात मुलींच्या आरोग्याची आणि शिक्षणाची सांगड घालण्यासाठी एक अत्यंत महत्त्वाचा निर्णय घेण्यात आला आहे. मासिक पाळीदरम्यान होणारी शारीरिक अस्वस्थता, आवश्यक साधनांची कमतरता आणि सामाजिक संकोच यांमुळे अनेकदा विद्यार्थिनींना शाळा बुडवावी लागते. यामुळे त्यांच्या शिक्षणात खंड पडतो. ही गंभीर बाब लक्षात घेऊन केंद्रीय माध्यमिक शिक्षण मंडळाने (CBSE) संलग्न शाळांमध्ये 'मासिक पाळी आरोग्य केंद्र' (Menstrual Health Center) स्थापन करणे बंधनकारक केले आहे.

जळगाव जिल्ह्यातील ३५ शाळांमध्ये अंमलबजावणी

जळगाव जिल्ह्यात सीबीएसईशी संलग्न असलेल्या सुमारे ३० ते ३५ शाळा आहेत. या नवीन निर्णयाचा लाभ पाचवी ते बारावीपर्यंत शिक्षण घेणाऱ्या हजारो विद्यार्थिनींना होणार आहे. शासनाने यासंदर्भात प्रशासनाला स्पष्ट पत्र दिले असून, जिल्ह्यातील सर्व ३५ केंद्रांवर हा उपक्रम टप्प्याटप्प्याने राबवला जाणार आहे.

आरोग्य केंद्रात कोणत्या सुविधा असतील?

या विशेष केंद्रांच्या माध्यमातून मुलींना शाळेतच सर्व सोयी उपलब्ध करून दिल्या जातील:

* सॅनिटरी नॅपकिन डिस्पेंसर: विनामूल्य किंवा सवलतीच्या दरात सॅनिटरी पॅड्स उपलब्ध होतील.

* स्वच्छ व स्वतंत्र स्वच्छतागृहे: मुलींच्या आरोग्यासाठी विशेष स्वच्छतागृहांची व्यवस्था.

* पर्यावरणपूरक विल्हेवाट: वापरलेल्या नॅपकिन्सची सुरक्षित विल्हेवाट लावण्यासाठी इन्सिनरेटर (Incinerator) मशीन बसवण्यात येतील.

* विश्रांती कक्ष: अस्वस्थता जाणवल्यास मुलींना थोडा वेळ आराम करता यावा, यासाठी स्वतंत्र जागा असेल.

'पिंक रूम'च्या धर्तीवर नवा बदल

जिल्हा परिषदेच्या काही शाळांमध्ये याआधीच 'पिंक रूम' ही संकल्पना राबवण्यात आली होती. आता त्याच धर्तीवर अधिक आधुनिक सोयी-सुविधांसह सीबीएसई शाळांमध्ये ही आरोग्य केंद्रे सुरू होणार आहेत. यामुळे विद्यार्थिनींची शाळेतील उपस्थिती वाढण्यास मदत होणार असून, कुचंबणा थांबणार आहे.

"शाळेतील विद्यार्थिनींच्या उपस्थितीत सातत्य राहावे आणि त्यांच्या शिक्षणात कोणत्याही कारणाने खंड पडू नये, यासाठी हा निर्णय अत्यंत स्वागतार्ह आहे. सर्व संबंधित शाळांनी याची प्रभावी अंमलबजावणी करणे आवश्यक आहे."

— कल्पना चव्हाण, शिक्षणाधिकारी (माध्यमिक), जळगाव.

शाळांना द्यावा लागणार अहवाल

या निर्णयाची अंमलबजावणी नेमकी कशी होत आहे, यावर प्रशासनाचे लक्ष असेल. काही शाळांनी यासंदर्भात आपला पहिला अहवाल सादर केला असून, स्वच्छतेच्या नियमांचे पालन करण्याबाबत आरोग्य तज्ज्ञांकडून मार्गदर्शनही घेतले जाणार आहे.