जळगाव अपडेट न्यूज, निखिल वाणी I नवीन वीज मीटर बसवून देण्यासाठी अगोदर चार हजार रुपयांची लाच स्वीकारल्यानंतर पुन्हा दोन हजार रुपयांची लाच घेत असताना महाराष्ट्र राज्य वीज वितरण कंपनीच्या जळगाव शहर उपविभागातील वरिष्ठ तंत्रज्ञ (वायरमन) जळगाव एसीबी पथकाच्या हाती रंगेहात सापडला आहे. आत्माराम धना लोंढे असे अटक करण्यात आलेल्या वायरमनचे नाव आहे.
या प्रकरणी जळगाव एसीबीच्या पोलीस निरीक्षक स्मिता नवघरे यांनी दिलेल्या फिर्यादीवरून एमआयडीसी पोलीस ठाण्यात भ्रष्टाचार प्रतिबंध अधिनियम, १९८८ अंतर्गत कलम ७ नुसार गुन्हा दाखल करण्यात आला आहे.
या लाच प्रकरणातील तक्रारदार हे एका डॉक्टरचे वडील असून त्यांनी आपल्या मुलाच्या नावे नवीन वीज मीटर घेण्यासाठी लागणाऱ्या कागदपत्रांबाबत माहिती घेण्यासाठी वायरमन आत्माराम लोंढे यांची भेट घेतली होती. यावेळी नवीन वीज मीटर बसवून देण्यासाठी लोंढे यांनी चार हजार रुपयांची मागणी केली होती. मागणीप्रमाणे तक्रारदारांनी चार हजार रुपये दिले होते.
तथापि, पैसे स्वीकारल्यानंतरही लोंढे यांनी वीज मीटर बसवून दिले नाही. याबाबत तक्रारदारांनी पुन्हा विचारणा केली असता, लोंढे यांनी आणखी दोन हजार रुपयांची लाच मागितली. पुन्हा लाच देण्याची इच्छा नसल्याने तक्रारदारांनी जळगाव एसीबी कार्यालयात तक्रार दाखल केली.
एसीबी पथकाने पंचांसमक्ष पडताळणी केल्यानंतर सापळा रचला असता, दोन हजार रुपयांची लाच स्वीकारताना वायरमन लोंढे यांना रंगेहात पकडण्यात आले. ही कारवाई पर्यवेक्षण व तपास अधिकारी योगेश ठाकूर यांच्या मार्गदर्शनाखाली सापळा अधिकारी स्मिता नवघरे, पोलीस कॉन्स्टेबल सचिन चाटे, अमोल सूर्यवंशी आदींनी केली.
टिप्पणी पोस्ट करा