जळगाव अपडेट न्यूज, निखिल वाणी I गेल्या महिनाभरापासून जळगाव शहरात वाढलेल्या घरफोडीच्या घटनांना आळा घालण्यात जळगाव स्थानिक गुन्हे शाखेला (एलसीबी) मोठे यश मिळाले आहे. एलसीबीच्या पथकाने एका आंतरराज्यीय अट्टल चोरट्याला अटक केली असून, त्याने जळगाव शहरात चार घरफोडी केल्याची कबुली दिली आहे.
घरफोडीच्या वाढत्या घटनांची गंभीर दखल घेत पोलीस अधीक्षक डॉ. महेश्वर रेड्डी व अपर पोलीस अधीक्षक अशोक नखाते यांनी स्थानिक गुन्हे शाखेला विशेष तपासाचे आदेश दिले होते. त्यानुसार एलसीबीचे पोलीस निरीक्षक राहुल गायकवाड यांनी विशेष पथक गठीत करून तपास सुरू केला.
तांत्रिक विश्लेषण व सीसीटीव्ही फुटेजच्या आधारे तपास करत पथकाने मध्यप्रदेशातील धार जिल्ह्यातील कुक्षी तालुक्यातील रहिवासी रमेश भुरूसिंग अनारे (वय २७) याला ताब्यात घेतले. चौकशीदरम्यान आरोपी रमेश अनारे याने जळगाव एमआयडीसी पोलीस स्टेशन हद्दीतील चार घरफोडीच्या गुन्ह्यांची कबुली दिली.
याशिवाय, या गुन्ह्यांमध्ये मध्यप्रदेशातील त्याचे पाच साथीदार — कुंद्या डावरीया, बरदान देवका, कालु डावरीया, राहुल डावरीया व सुनील परमाती — सहभागी असल्याची महत्त्वपूर्ण माहितीही त्याने उघड केली आहे.
आरोपी रमेश अनारे याला पुढील कारवाईसाठी एमआयडीसी पोलिसांच्या ताब्यात देण्यात आले असून, पोलीस उपनिरीक्षक चंद्रकांत धनके पुढील तपास करीत आहेत.
टिप्पणी पोस्ट करा