जळगाव अपडेट न्यूज, निखिल वाणी I छत्रपती संभाजीनगर येथील देवगिरी नागरी सहकारी बँक लिमिटेडच्या चाळीसगाव शाखेत तब्बल ₹५ कोटी ३३ लाख ८५ हजार ३५६ रुपयांच्या फसवणुकीचा धक्कादायक प्रकार उघडकीस आला आहे. या प्रकरणी शिवसेना (ठाकरे गट) नेते आणि माजी खासदार उन्मेष भैय्यासाहेब पाटील यांच्यासह चौघांविरुद्ध चाळीसगाव ग्रामीण पोलिस ठाण्यात फसवणुकीसह विविध कलमान्वये गुन्हा दाखल करण्यात आला आहे. या घटनेमुळे चाळीसगावसह जिल्ह्यातील राजकीय वर्तुळात मोठी खळबळ उडाली आहे.
देवगिरी बँकेचे चाळीसगाव शाखा व्यवस्थापक जीवन राजूरकर यांनी दिलेल्या फिर्यादीवरून उन्मेष पाटील, संजय धनकवडे, प्रशांत वाघ आणि प्रमोद जाधव या चौघांविरुद्ध गुन्हा नोंदवण्यात आला आहे.
फिर्यादीत नमूद केल्याप्रमाणे, ‘उमंग व्हाईट गोल्ड प्रायव्हेट लिमिटेड’ या कंपनीच्या नावाने औद्योगिक कर्ज घेण्यात आले होते. मात्र, काही काळानंतर ते कर्ज एनपीए झाले. बँकेकडून वारंवार परतफेडीसाठी संधी देऊनही रक्कम न भरल्याने वसुलीची प्रक्रिया सुरू करण्यात आली. या दरम्यान बँकेकडे गहाण ठेवलेली मशिनरी कंपनीच्या संचालकांनी संगनमताने विकल्याचा गंभीर आरोप करण्यात आला आहे.
या प्रकारामुळे बँकेची कोट्यवधी रुपयांची फसवणूक झाल्याचे फिर्यादीत नमूद करण्यात आले आहे. पोलिसांनी या चौघांविरुद्ध फसवणूक, विश्वासघात आणि संबंधित कलमान्वये गुन्हा दाखल करून तपास सुरू केला आहे. दरम्यान, या प्रकरणामुळे चाळीसगाव परिसरात आणि राजकीय वर्तुळात चर्चेला उधाण आले आहे.
टिप्पणी पोस्ट करा