जळगाव अपडेट न्यूज, निखिल वाणी I रामानंद नगर पोलीस पथकाने गुटख्याची बेकायदेशीर वाहतूक करणाऱ्या एका वाहनावर कारवाई करत सुमारे ३० लाख २० हजार रुपये किमतीचा गुटखा जप्त केला. या प्रकरणात वाहनचालक किरण भास्कर नांदरे (वय ४३, रा. सेंट्रल बँक कॉलनी, पिंप्राळा) याला अटक करण्यात आली असून त्याच्याविरुद्ध गुन्हा दाखल करण्यात आला आहे.
मिळालेल्या माहितीनुसार, मंगळवारी दुपारी पिंप्राळा परिसरातील सेंट्रल बँक कॉलनी येथील एकमुखी दत्त मंदिराजवळ एमएच १९ सीएक्स ६६३४ या क्रमांकाचे मालवाहू वाहन संशयास्पदरीत्या उभे असल्याची माहिती पोलिसांना मिळाली. पोलीस निरीक्षक राजेंद्र गुंजाळ यांच्या मार्गदर्शनाखाली उपनिरीक्षक सचिन रणशेवरे, पोहेकॉ कालसिंग बारेला, प्रवीण जगदाळे व विनोद सुर्यवंशी यांनी तत्काळ घटनास्थळी धाव घेतली.
वाहनाची तपासणी केली असता त्यात राज्यात प्रतिबंधित असलेला गुटखा, पानमसाला व तंबाखूने भरलेली पोती व बॉक्स आढळून आले. याबाबत अन्न व औषध प्रशासनाला कळविण्यात आले. त्यानुसार अन्न सुरक्षा अधिकारी शरद पवार, अमोल जगताप, आकाश बोऱ्हाडे व योगराज सुर्यवंशी यांनी घटनास्थळी येऊन तपासणी केली.
एकूण २४ लाख २० हजार रुपये किमतीचा मुद्देमाल जप्त करण्यात आला. पोलिसांनी चालकाला ताब्यात घेऊन गुटखा पुरवठ्याच्या साखळीबाबत चौकशी सुरू केली आहे. पंचनामा करून वाहन पोलिस ठाण्यात जमा करण्यात आले असून गुटखा तस्करीचा उगम शोधण्याचे काम सुरू आहे. या घटनेत चालक किरण भास्कर नांदरे याच्याविरुद्ध रामानंद नगर पोलिस ठाण्यात गुन्हा नोंदविण्यात आला आहे.
टिप्पणी पोस्ट करा