जळगाव अपडेट न्यूज, निखिल वाणी I नवीपेठ परिसरातील एटीएमवर पैसे काढण्यासाठी गेलेल्या निवृत्त प्राध्यापक गयास अहमद उस्मानी (वय ६१, रा. सालारनगर) यांची एटीएम फसवणुकीच्या प्रकारात २५ हजार रुपयांची फसवणूक झाल्याची घटना उघडकीस आली आहे. हा प्रकार ६ ऑक्टोबर रोजी घडला असून, प्राध्यापक उस्मानी यांनी ८ ऑक्टोबरला शहर पोलिस ठाण्यात तक्रार नोंदवली आहे.
मिळालेल्या माहितीनुसार, उस्मानी यांचे पंजाब नॅशनल बँकेत बचत खाते आहे. ६ ऑक्टोबर रोजी ते एटीएममधून पैसे काढत असताना एका अनोळखी व्यक्तीने मदतीचा बहाणा करून त्यांचे कार्ड बदलले. त्यावेळी पैसे न मिळाल्याने उस्मानी घरी परतले, मात्र थोड्याच वेळात त्यांच्या मोबाईलवर १० हजार, पुन्हा १० हजार आणि त्यानंतर ५ हजार रुपये अशा तीन व्यवहारांचे मेसेज आले. एकूण २५ हजार रुपये खात्यातून काढले गेल्याचे त्यांनी पाहिले.
प्राध्यापकांनी तत्काळ बँकेत संपर्क साधला असता, प्रारंभी पैसे परत मिळतील असे सांगण्यात आले, मात्र परिस्थिती पाहता फसवणुकीचा संशय बळावला.
या प्रकरणी उस्मानी यांच्या तक्रारीवरून शहर पोलिस ठाण्यात अनोळखी व्यक्तीविरुद्ध गुन्हा दाखल करण्यात आला असून, पुढील तपास पोहेकॉ जितेंद्र तावडे करीत आहेत.
टिप्पणी पोस्ट करा