जळगाव अपडेट न्यूज, निखिल वाणी I महाराष्ट्र लेवा पाटीदार महासंघाच्या खान्देश विभागातर्फे लेवा पाटीदार समाजाचे आराध्य दैवत आणि अस्मिता ‘लोखंडपुरुष’ सरदार वल्लभभाई पटेल यांची १५० वी जयंती मोठ्या उत्साहात साजरी करण्यात आली. हा कार्यक्रम माजी नगराध्यक्ष पांडुरंग (बंडू दादा) काळे यांच्या निवासस्थानी पार पडला.
कार्यक्रमाची सुरुवात मान्यवरांच्या हस्ते सरदार पटेल, कवयित्री बहिणाबाई चौधरी आणि विठ्ठल माऊली यांच्या प्रतिमांना पुष्पहार अर्पण करून झाली. या वेळी माजी नगराध्यक्ष बंडू दादा काळे, महासंघाचे अध्यक्ष अरुण बोरोले, विभागीय संयोजक प्रकाश वराडे, पत्रकार अमोल कोल्हे, जिल्हा लेवा पाटीदार मंडळाचे अध्यक्ष लिलाधर चौधरी, मनकर्णिका महिला मंडळ अध्यक्षा सौ. नीता वराडे, लेवा सम्राज्ञी फाउंडेशन अध्यक्षा डॉ. सौ. ज्योती महाजन, ॲड. डॉ. सौ. ज्योती भोळे, सौ. नीलिमा राणे, प्राचार्या साधना लोखंडे, मुख्याध्यापिका पुष्पा पाटील आदींची प्रमुख उपस्थिती होती.
कार्यक्रमादरम्यान भारताच्या माजी पंतप्रधान श्रीमती इंदिरा गांधी यांच्या स्मृतीदिनानिमित्त श्रद्धांजली अर्पण करण्यात आली.
महासंघाचे अध्यक्ष अरुण बोरोले यांनी प्रास्ताविकात सरदार पटेल यांच्या कार्यावर प्रकाशझोत टाकत, डॉ. विजय महाजन यांच्या इंदाला ग्रुप, कल्याण येथे झालेल्या लेवा कार्यकर्त्यांच्या महासभेचा आढावा सादर केला. त्यांनी महासंघाचे ब्रीदवाक्य “एकमेका साहाय्य करू अवघे धरू सुपंथ” सांगत समाजाच्या एकतेचे महत्त्व अधोरेखित केले.
डॉ. मिलिंद पाटील यांनी स्वतःची रचना असलेली सरदार पटेल व लेवा समाजावर आधारित कविता सादर केली. त्यांना सौ. निता वराडे, ॲड. डॉ. ज्योती भोळे, सौ. नीलिमा राणे, श्रीमती साधना लोखंडे यांनी स्वर साथ दिली.
ॲड. ज्योती भोळे यांनी स्टॅच्यू ऑफ युनिटी विषयी सांगत सरदार पटेल यांच्या महानतेवर भाष्य केले.
या वेळी माहिती अधिकार कार्यकर्ता व पत्रकार अमोल कोल्हे यांची नुकतीच मानवी हक्क संरक्षण व जागृती संघटनेच्या जिल्हाध्यक्षपदी झालेल्या निवडीबद्दल महासंघातर्फे सत्कार करण्यात आला.
यानंतर विविध पदांवर महिला कार्यकर्त्यांची नियुक्ती करण्यात आली. जळगाव विभाग महिला ज्येष्ठ सल्लागार डॉ. ज्योती महाजन, महिला व कायदेविषयक सल्लागार ॲड. डॉ. ज्योती भोळे, महिला जिल्हा उपाध्यक्ष सौ. निता वराडे, महिला संयोजक साधना लोखंडे, सौ. नीलिमा राणे, सौ. नीला चौधरी यांना नियुक्तीपत्र प्रदान करण्यात आले.
बंडू दादा काळे यांनी समाजासाठी एकत्रितपणे कार्य करण्याचे आवाहन केले. त्यांनी म्हटलं, “समाजाच्या हितासाठी योग्य दिशेने काम झालं पाहिजे; अन्यथा केवळ नावापुरती संघटना ठरते.”
प्रकाश वराडे यांनी लेवा समाजातील दोन कन्या – कु. भूमिका संजय नेहेते (नाशिक) व कु. भूमिका भूषण नेमाडे (डोंबिवली) यांच्या आंतरराष्ट्रीय क्रीडा कामगिरीबद्दल अभिमान व्यक्त करत त्यांचे अभिनंदन केले.
सौ. निता वराडे यांनी महिलांचा सहभाग वाढवण्यासाठी महासंघातर्फे लवकरच महिला संमेलन घेण्याची घोषणा केली.
या कार्यक्रमाला खान्देश विभागाचे उपाध्यक्ष चंद्रकांत बेंडाळे, नितीन इंगळे, महेंद्र पाटील, किशोर भंगाळे, सुनील काळे, उमाकांत बोंडे, यादवराव बऱ्हाटे, भास्कर बोरोले, गजानन किनगे, घनश्याम चौधरी, प्रदीप पाटील, किशोर खडसे, मुरलीधर पाटील आदी मान्यवर उपस्थित होते.
कार्यक्रमानंतर हाय-टी चे आयोजन करण्यात आले. संपूर्ण कार्यक्रमाचे सुयोग्य सूत्रसंचालन व आभार प्रदर्शन डॉ. मिलिंद पाटील यांनी केले.
कार्यक्रमाची सांगता श्रीमती साधना लोखंडे यांनी गायिलेल्या राष्ट्रगीताने झाली.
टिप्पणी पोस्ट करा