महाविकास आघाडीला जळगावमध्ये मोठा धक्का, माजी महापौरांसह अनेक नेत्यांचा भाजपात प्रवेश, “सत्तेसाठी भाजपची घाई! विरोधकांना घेतले सोबत, जुन्या कार्यकर्त्यांची नाराजीची चर्चा”
जळगाव अपडेट न्यूज, निखिल वाणी I राज्यात स्थानिक स्वराज्य संस्थांच्या निवडणुका जवळ येत असताना राजकीय हालचालींना वेग आला आहे. अनेक जिल्ह्यांमध्ये महाविकास आघाडीला धक्का देत भारतीय जनता पक्षाने आपले राजकीय समीकरण घट्ट करण्यास सुरुवात केली आहे. त्याच पार्श्वभूमीवर जळगाव महानगरपालिकेतही सत्तेचा गणिती खेळ रंगू लागला असून, भाजपने विरोधकांना आपल्या सोबत घेत महाविकास आघाडीला मोठा धक्का दिला आहे.
आज झालेल्या भव्य कार्यक्रमात महाविकास आघाडीतील शिवसेना (ठाकरे गट) चे ज्येष्ठ नेते आणि माजी महापौर नितीन लढा, माजी महापौर जयश्रीताई सुनील महाजन, विरोधी पक्षनेते सुनील महाजन, नगरसेवक प्रशांत नाईक यांच्यासह अनेक नगरसेवक, पदाधिकारी व कार्यकर्त्यांनी भाजपमध्ये प्रवेश केला. या प्रवेशामुळे जळगाव महानगरपालिकेतील राजकीय समीकरणात मोठा बदल घडून येणार आहे.
सन २०१९ च्या मनपा निवडणुकीत भाजपने एकहाती सत्ता मिळवून महापौरपदावर आपले वर्चस्व प्रस्थापित केले होते. अनेक नव्या चेहऱ्यांना नगरसेवकपदाची संधी मिळाली होती. मात्र, अडीच वर्षांनंतर अंतर्गत गटबाजी आणि नाराजीमुळे काही नगरसेवकांनी भाजपविरोधात बंडखोरीचा झेंडा उभारला. या बंडखोरीच्या पार्श्वभूमीवर ठाकरेंच्या गटाने भाजपविरोधी आघाडी तयार केली आणि जयश्रीताई सुनील महाजन यांना महापौरपदाची संधी मिळाली होती.
आता पुन्हा एकदा, २०२५ च्या मनपा निवडणुकीच्या तोंडावर भाजपने विरोधकांना आपल्या गोटात घेत सत्तेसाठी नव्या रणनितीचा अवलंब केला आहे. या प्रवेशामुळे भाजपचे संख्याबळ वाढले असले तरी, दीर्घकाळ पक्षनिष्ठेने काम करणाऱ्या जुन्या कार्यकर्त्यांमध्ये नाराजीची कुजबुज सुरू झाली आहे. कारण पुन्हा एकदा “आयात उमेदवारांचा” प्रचार करावा लागणार असल्याचे कार्यकर्त्यांमध्ये बोलले जात आहे.
भाजपच्या या रणनीतीमुळे जळगाव मनपातील सत्ता समीकरणात मोठे राजकीय उलथापालथीचे संकेत मिळत आहेत. महाविकास आघाडीसाठी हा धक्का ठरणार की नव्या भाजप गोटासाठी आव्हान, हे येणारे काही दिवस ठरवतील.
भाजपच्या जुन्या कार्यकर्त्यांची नाराजी
“आम्ही वर्षानुवर्षे पक्ष वाढवण्यासाठी रात्रंदिवस मेहनत घेतली, घराघरांत जाऊन जनतेशी नातं जोडलं. मात्र, प्रत्येक निवडणुकीच्या वेळी बाहेरून आलेल्या विरोधकांनाच संधी दिली जाते व आम्हाला केवळ प्रचारापुरते वापरले जाते. सत्तेसाठी आयात नेते घेतले जातात, पण आमच्या त्याग व निष्ठेचं मूल्य कमी केलं जातं. अशा पद्धतीने जुन्या कार्यकर्त्यांकडे दुर्लक्ष होत राहिलं, तर ही नाराजी पुढील निवडणुकीत मतदानातून दिसून येईल.” अशी कार्यकर्त्यांमध्ये चर्चा आहे.
टिप्पणी पोस्ट करा