जळगाव अपडेट न्यूज, निखिल वाणी I जळगाव शहरातील मोहाडी रोड परिसरात दौलत नगर परिसरासमोर गवळी वाड्याजवळ शनिवारी (११ ऑक्टोबर) दुपारी घडलेल्या एका घटनेने परिसरात तणावाचे वातावरण निर्माण झाले आहे. लव जिहादच्या संशयावरून काही तरुणांनी एका तरुणाला बेदम मारहाण करून त्याची दुचाकी पेटवून दिल्याची धक्कादायक घटना घडली. यात जखमी झालेल्या तरुणावर सध्या रुग्णालयात उपचार सुरू आहेत.
मिळालेल्या माहितीनुसार, भुसावळ तालुक्यातील एक तरुण आणि तरुणी हे दोघे शनिवारी दुपारी मोहाडी रोड परिसरातील एका दुकानासमोर थांबले होते. त्याचवेळी काही स्थानिक तरुणांनी संशयाच्या भावनेतून त्यांच्याकडे चौकशी केली. यावेळी दुचाकीवरील तरुणाने अर्वाच्च भाषेचा वापर केल्याचे सांगितले जाते. या वादातून परिस्थिती चिघळली आणि उपस्थित तरुणांनी त्या तरुणाला बेदम मारहाण केली.
या घटनेनंतर संतप्त तरुणांनी त्या दुचाकीला आग लावली. त्यामुळे दुचाकी पूर्णतः जळून खाक झाली. जखमी तरुणाला तात्काळ रुग्णालयात दाखल करण्यात आले असून त्याच्यावर उपचार सुरू आहेत.
घटनेची माहिती मिळताच एमआयडीसी पोलीस ठाण्याचे पथक घटनास्थळी दाखल झाले. पोलिसांनी परिस्थिती नियंत्रणात आणत, या प्रकरणात संशयित असलेल्या ८ ते १० जणांना ताब्यात घेतले आहे. घटनेबाबत गुन्हा नोंदविण्याची प्रक्रिया सुरू असून पुढील तपास एमआयडीसी पोलीस करीत आहेत.
टिप्पणी पोस्ट करा