*८० स्टॉलमधून पावसाळी हंगामातील रानभाज्यांची विविधता रसिकांसमोर*
जळगाव अपडेट न्यूज, निखिल वाणी I “आपल्या धकाधकीच्या जीवनशैलीत आहाराचा मोठा वाटा आहे. आरोग्य टिकवण्यासाठी आणि रोगप्रतिकारक शक्ती वाढवण्यासाठी वडिलोपार्जित रानभाज्यांचा आहारात समावेश करणे आवश्यक आहे. रासायनिक फवारणी नसलेल्या या भाज्या सेंद्रिय, सुरक्षित व पोषक असून पावसाळी हंगामात मिळणारा हा निसर्गाचा मेवा सर्वांनी स्वीकारावा. ‘रानभाजी खा... निरोगी रहा’ हा मूलमंत्र आत्मसात करावा,” असे आवाहन पाणीपुरवठा व स्वच्छता मंत्री तथा जिल्ह्याचे पालकमंत्री गुलाबराव पाटील यांनी केले.
रोटरी भवनात रानभाजी महोत्सव
मायादेवी नगर येथील रोटरी भवनात प्रकल्प संचालक (आत्मा) जळगाव, जिल्हा अधीक्षक कृषी अधिकारी कार्यालय, कृषी विज्ञान केंद्र जळगाव-पाल व रोटरी क्लब ऑफ जळगाव वेस्ट यांच्या संयुक्त विद्यमाने रानभाजी महोत्सवाचे आयोजन करण्यात आले. जिल्हाभरातून आलेल्या शेतकरी गट व महिला बचत गटांनी पारंपरिक पद्धतीने पिकवलेल्या रानभाज्या व प्रक्रिया उत्पादनांचे तब्बल ८० स्टॉल उभारले.
पालकमंत्र्यांच्या हस्ते महोत्सवाचे उद्घाटन झाले. त्यांनी विविध रानभाज्यांपासून तयार केलेल्या पदार्थांचा आस्वाद घेतला. या वेळी रोटरी क्लबतर्फे ७५ गरजू विद्यार्थ्यांना दर्जेदार दप्तरांचे वाटप करण्यात आले. आदिवासी महिलांनी ‘रान मेवा’ भेट देऊन पालकमंत्र्यांचे स्वागत केले.
बहिणींनी बांधल्या राख्या
रानभाजी महोत्सवानंतर बहिणींनी पालकमंत्र्यांना राखी बांधून भावा-बहिणीच्या स्नेहाचे नाते दृढ केले. पालकमंत्र्यांनीही या बहिणींच्या मदतीसाठी कायम तत्पर राहण्याचे आश्वासन दिले.
आदिवासी नृत्याने रंगत
यावल तालुक्यातील आदिवासी बांधवांनी पारंपरिक नृत्य व वाद्य सादरीकरण करून उपस्थितांचे मन जिंकले. ग्राहकांना रानभाज्यांची विक्रीबरोबरच पाककृतींची माहिती देण्यात आली. पाककला स्पर्धेत विजेत्यांचा सन्मान मान्यवरांच्या हस्ते झाला.
कार्यक्रमाचे सूत्रसंचालन श्रीकांत झांबरे यांनी केले, तर आभार भरत इंगळे यांनी मानले. या प्रसंगी आ. सुरेश (राजूमामा) भोळे, जिल्हाधिकारी आयुष प्रसाद, जिल्हा अधीक्षक कृषी अधिकारी कुर्बान तडवी, रोटरी क्लब अध्यक्ष गौरव सापळे, प्रकल्प प्रमुख योगेश भोळे, सचिव देवेश कोठारी, महेश सोनी यांच्यासह कृषी विभागातील अधिकारी, कर्मचारी व शेतकरी मोठ्या संख्येने उपस्थित होते.
टिप्पणी पोस्ट करा