जळगाव अपडेट न्यूज, निखिल वाणी I अनुभूती रेसिडेन्शियल स्कूल, जळगावच्या फुटबॉल मैदानावर सुरू असलेल्या १७ वर्षांखालील सीआयएससीई राष्ट्रीय प्री-सुब्रोतो कप महिला फुटबॉल स्पर्धेला चुरशीची कलाटणी मिळाली आहे. आज झालेल्या साखळी फेरीतील सामन्यांमधून महाराष्ट्र, कर्नाटक, बिहार आणि पंजाब या संघांनी सेमी फायनलमध्ये प्रवेश मिळवला आहे.
बाद फेरीतील उपांत्य लढती उद्या (दि. १२ जुलै) पार पडणार असून, कर्नाटक विरुद्ध बिहार आणि पंजाब विरुद्ध महाराष्ट्र असे दोन सामन्यांचे सामने रंगणार आहेत. अंतिम सामन्यात विजयी व उपविजयी संघातील खेळाडूंना जिल्हाधिकारी आयुष प्रसाद, जैन इरिगेशनचे अध्यक्ष अशोक जैन, शाळेचे अध्यक्ष अतुल जैन आणि संचालिका सौ. निशा अनिल जैन यांच्या हस्ते गौरवण्यात येणार आहे.
आज साखळी फेरीत झालेल्या आठ सामन्यांत खेळाडूंनी उत्कृष्ट खेळ कौशल्याचे प्रदर्शन केले. प्रमुख निकाल पुढीलप्रमाणे:
पंजाब ४ – ० गुजरात
महाराष्ट्र ४ – ० उत्तर प्रदेश
बिहार १ – ० तामिळनाडू
कर्नाटक ५ – ० वेस्ट बंगाल
पंजाब ६ – ० तेलंगणा
तामिळनाडू ० – ० गुजरात (सामना बरोबरीत)
कर्नाटक १ – ० महाराष्ट्र
बिहार ६ – ० तेलंगणा
प्रत्येक सामन्यानंतर ‘मॅन ऑफ द मॅच’ खेळाडूंना सन्मानचिन्ह प्रदान करण्यात आले.
आजच्या सामन्यांच्या नाणेफेकीसाठी प्रमुख पाहुणे म्हणून जैन इरिगेशनचे अभंग अजित जैन, हेड कोच सुयश बुरकुल, जैन स्पोर्ट्स अकॅडमीचे प्रशासकीय अधिकारी अरविंद देशपांडे, विक्रांत जाधव (अनुभूती शाळा), मेडिकल ऑफिसर डॉ. स्नेहल पाटील, महाराष्ट्र तायक्वांडो असोसिएशनचे अजित घारगे, क्रिकेटपटू निरज जोशी व रणजीपटू ओम मुंढे, प्रशिक्षक मुश्ताक अली यांची उपस्थिती होती.
या स्पर्धेच्या यशस्वी आयोजनासाठी सीआयएससीई स्पर्धा आयुक्त ललिता सावंत व सिद्धार्थ किल्लोस्कर (सीआयएससीई मुंबई विभाग समन्वयक) यांच्या मार्गदर्शनाखाली संयोजन करण्यात आले. आयोजनात जैन स्पोर्ट्स अकॅडमीचे अरविंद देशपांडे, रवींद्र धर्माधिकारी, विक्रांत जाधव यांच्यासह प्रशिक्षक अब्दुल मोहसिन, सुयश बुरकुल, घनश्याम चौधरी, राहुल निंभोरे, उदय सोनवणे, वरुण देशपांडे यांनी महत्त्वाची भूमिका बजावली.
टिप्पणी पोस्ट करा