रिंगणगाव प्रकरणावरून संतप्त ग्रामस्थांचा खासदार स्मिता वाघ यांना घेराव; आश्वासनांवर नाराजी
जळगाव अपडेट न्यूज, निखिल वाणी I जळगाव जिल्ह्यातील एरंडोल तालुक्यातील रिंगणगाव येथे एका १४ वर्षीय मुलाचा अत्यंत क्रूरपणे खून झाल्याची धक्कादायक घटना घडली आहे. या घटनेने संपूर्ण परिसरात खळबळ उडाली असून, हा केवळ साधा खून नसून नरबळी दिला गेल्याचा संशय ग्रामस्थांनी व्यक्त केला आहे. या प्रकरणात पोलिसांकडून वेळेवर योग्य ती कारवाई न झाल्याचा आरोपही ग्रामस्थांनी केला आहे.
ग्रामस्थांच्या मते, मृत मुलाच्या शरीरावर आढळलेली जखमेची खुणा, काही विशिष्ट प्रकारची रचना आणि घटना घडल्याची वेळ या सर्व बाबी संशयास्पद असल्याने हा नरबळीचा प्रकार असावा, असा प्राथमिक अंदाज आहे. मात्र, पोलिसांनी या शक्यतेकडे दुर्लक्ष केल्याचा आरोप ग्रामस्थ करत आहेत.
या पार्श्वभूमीवर ग्रामस्थांनी मोठ्या प्रमाणावर एकत्र येत जिल्हाधिकारी कार्यालयावर मोर्चा काढला. 'मुलाला न्याय मिळालाच पाहिजे', 'संशयित आरोपींना अटक करा', 'पोलिसांची भूमिका तपासा' अशा जोरदार घोषणा देत ग्रामस्थांनी संतप्त आंदोलन छेडले.
मोर्चादरम्यान खासदार स्मिता वाघ या घटनास्थळी पोहोचल्यावर ग्रामस्थांचा रोष त्यांच्या विरोधात व्यक्त झाला. ग्रामस्थांनी खासदारांवर आपल्या संतापाची झळ उमटवताना, "केवळ आश्वासन देऊन निघून जाणाऱ्यांची आम्हाला गरज नाही," असे म्हणत नाराजी व्यक्त केली. या आंदोलनामुळे वातावरण काही काळासाठी तणावपूर्ण झाले होते.
दरम्यान, जिल्हा प्रशासनाने प्रकरणाची गंभीर दखल घेतली असून, संपूर्ण घटनेचा तपास उच्चस्तरीय अधिकाऱ्यांकडे सोपवण्यात यावा अशी मागणी होत आहे. पोलिसांकडूनही या प्रकरणात अधिक तपास सुरू असल्याचे सांगण्यात येत आहे.
या घटनेमुळे परिसरात भीतीचे वातावरण असून, ग्रामस्थ एकच सवाल करत आहेत – "आमच्या मुलाला न्याय कधी मिळणार?"
जवळच्या गावांमधूनही या घटनेविषयी संताप व्यक्त होत असून, प्रशासनाने तातडीने ठोस पावले उचलली नाहीत तर आंदोलन अधिक तीव्र होईल, असा इशाराही ग्रामस्थांनी दिला आहे.
टिप्पणी पोस्ट करा