जळगाव अपडेट न्यूज निखिल वाणी I एमआयडीसी परिसरातील एका गोडाऊनमध्ये चोरी करून ८ लाख ३५ हजार रुपयांचा मसाला माल लंपास करणाऱ्या टोळीचा पर्दाफाश करत एमआयडीसी पोलिसांनी अवघ्या ४८ तासांत आरोपींना अटक केली. विशेष म्हणजे, चोरीस गेलेला संपूर्ण मुद्देमालही पोलिसांनी हस्तगत केला आहे.
एमआयडीसीतील एम सेक्टर २११/२ येथे अतुल विश्वनाथ मुळे यांच्या मालकीची ‘श्री प्रभु डिस्ट्रीब्युटर्स’ ही कंपनी आहे. कंपनी जळगाव, धुळे आणि नंदुरबार जिल्ह्यांत रामबंधू मसाले कंपनीची डीलरशिप सांभाळते. २५ मार्च २०२५ रोजी रात्री अज्ञात चोरट्यांनी या कंपनीच्या गोडाऊनचे शटर तोडून ७१ गोण्या मसाल्यांचा साठा चोरला. चोरीस गेलेल्या मालाची किंमत ८.३५ लाख रुपये आहे. यासंदर्भात २७ मार्च रोजी अतुल मुळे यांनी एमआयडीसी पोलीस ठाण्यात तक्रार दाखल केली. पोलिसांनी गुन्हा क्रमांक २२९/२०२५ अन्वये भादंवि कलम ३३१ अंतर्गत गुन्हा नोंदवला.
पोलिसांचा जलद तपास आणि कारवाई
घटनेचे गांभीर्य लक्षात घेऊन पोलीस अधीक्षक डॉ. महेश्वर रेड्डी आणि अपर पोलीस अधीक्षक अशोक नखाते यांनी चोरीच्या घटनांवर नियंत्रण ठेवण्याचे निर्देश दिले. त्यानुसार, उपविभागीय पोलीस अधिकारी संदीप गावीत आणि एमआयडीसी पोलीस ठाण्याचे निरीक्षक संदीप पाटील यांच्या मार्गदर्शनाखाली गुन्हे शोध पथक तपासासाठी सक्रिय झाले.
पोलीस उपनिरीक्षक राहुल तायडे, पोलीस कर्मचारी चंद्रकांत धनके, राहुल रगडे, गणेश ठाकरे, विशाल कोळी, सिद्धेश्वर डापकर, रतन गिते यांच्या पथकाने तपासादरम्यान सीसीटीव्ही फुटेज तपासले. यात आरोपींनी तोंडाला रुमाल बांधून ईको कारच्या मदतीने चोरी केल्याचे स्पष्ट झाले. तांत्रिक विश्लेषण आणि तपासाच्या आधारे मुख्य आरोपी अनिल रमेश पाटील (रा. मिल कॉलनी, खडका, ता. भुसावळ) याची ओळख पटली. विशेष म्हणजे, अनिल पाटील हा फिर्यादी अतुल मुळे यांच्या कंपनीत १५ वर्षांपासून चालक म्हणून कार्यरत होता.
पोलिसांनी अनिल पाटीलला ताब्यात घेतले असता, त्याने गुन्ह्याची कबुली दिली आणि आपल्या सहकारी आरोपींची नावे सांगितली. त्यानंतर पोलिसांनी पुढील कारवाई करत चोरीस गेलेला संपूर्ण माल जप्त केला.
व्यापाऱ्यांत समाधान, पोलिसांच्या कार्यक्षमतेचे कौतुक
या जलद आणि प्रभावी कारवाईमुळे एमआयडीसी परिसरातील व्यापाऱ्यांनी समाधान व्यक्त केले असून, पोलिसांच्या कार्यक्षमतेचे विशेष कौतुक होत आहे. जळगाव पोलिसांनी दाखवलेल्या तत्परतेमुळे चोरीसारख्या घटनांवर नियंत्रण मिळवण्यास मदत होणार असल्याचे व्यापारी व औद्योगिक वर्तुळातून बोलले जात आहे.
टिप्पणी पोस्ट करा