मोठा साठा जप्त, ३.९६ लाखांचा मुद्देमाल हस्तगत
जळगाव अपडेट न्यूज, निखिल वाणी I नशिराबाद पोलिस ठाण्याच्या हद्दीत अवैधरित्या घरगुती गॅस सिलेंडरमधून ऑटो रिक्षामध्ये गॅस भरला जात असल्याची माहिती मिळाल्यानंतर, स्थानिक गुन्हे शाखेच्या पथकाने धडक कारवाई करत मोठा गॅस साठा जप्त केला.
गुरुवारी (७ मार्च २०२५) रात्रगस्ती दरम्यान पोलिसांना या अवैध गॅस भरण्याची माहिती मिळाली आणि तात्काळ कारवाई करण्यात आली. संशयित आफताब आलम शेख रहीम (वय २८, रा. रहमतपुर, नशिराबाद) याला ताब्यात घेतले असून, ३.९६ लाख रुपये किमतीचा मुद्देमाल जप्त करण्यात आला आहे.
रात्रगस्ती दरम्यान नशिराबाद पोलिस ठाण्याच्या हद्दीत एका इसमाला घरगुती गॅस सिलेंडरमधून ऑटो रिक्षामध्ये गॅस भरताना आढळून आले. पोलिसांना पाहताच रिक्षाचालकाने अंधाराचा फायदा घेत पळ काढला, परंतु पोलिसांनी त्वरित घटनास्थळी शोध मोहीम राबवून आफताब आलम शेख रहीम याला ताब्यात घेतले.
तपासणीदरम्यान, पोलिसांनी टाटा Ase कंपनीची मालवाहतूक गाडी, १३ भरलेले गॅस सिलेंडर, ४ रिकामे सिलेंडर, १ अर्धे भरलेले सिलेंडर आणि गॅस भरण्याचे साहित्य असा ३,९६,१५० रुपये किमतीचा मुद्देमाल जप्त केला.
भारतीय न्याय संहिता आणि अत्यावश्यक सेवा वस्तू अधिनियम (EC Act) अंतर्गत गुन्हा दाखल करण्यात आला आहे. संबंधित प्रकरणात गु.र.क्र. ३७/२०२५ भारतीय न्याय संहिता २०२३ चे कलम २८७, २८८, २२३ आणि EC Act ०३ व ०७ अन्वये गुन्हा दाखल करण्यात आला आहे.
ही कारवाई पोलीस उपनिरीक्षक शरद बागल यांच्या नेतृत्वाखालील पथकाने केली असून, त्यात पोलीस हवालदार कमलाकर बागुल, गजानन देशमुख, गोपाळ गव्हाळे, संघपाल तायडे आणि पोलीस कॉन्स्टेबल सचिन पोळ यांनी सक्रिय सहभाग घेतला.
नागरिकांना अवैध गॅस विक्री किंवा रिफिलिंगबाबत तात्काळ पोलिसांना माहिती देण्याचे आवाहन करण्यात आले आहे. पुढील तपास नशिराबाद पोलिस ठाणे करीत आहे.
टिप्पणी पोस्ट करा