गोपनीय माहितीवरून वरणगाव पोलिसांची कारवाई, ९९ हजाराचा रुपयांचा मुद्देमाल जप्त
जळगाव अपडेट न्यूज, निखिल वाणी I वरणगाव शहरातील रेल्वे स्टेशन रोडवरील महात्मा गांधी विद्यालयाजवळ गावठी पिस्तूल आणि दोन जिवंत काडतूसांसह दोन जणांना वरणगाव पोलीसांनी १३ फेब्रुवारी रोजी सायंकाळी ६ वाजता अटक केली. याप्रकरणी गावठी पिस्तूल, जिवंत काडतूस व बुलेट मोटारसायकल असा एकूण ९९ हजार रुपयांचा मुद्देमाल जप्त करण्यात आला आहे.
वरणगाव पोलीस ठाण्याचे सहाय्यक पोलीस निरीक्षक जनार्दन खंडेराव यांना गोपनीय माहिती मिळाली होती की, दोन व्यक्ती बुलेट मोटारसायकलवर अवैधपणे गावठी पिस्तूल घेऊन दहशत निर्माण करत आहेत. या माहितीवरून पोलिसांनी सायंकाळी ६ वाजता छापा टाकला आणि संशयित आरोपी आदेश ज्ञानेश्वर भैसे (वय १९, रा. आंबेडकरनगर, वरणगाव) व गौरव संतोष इंगळे (वय २०, रा. वामन नगर, वरणगाव) यांना ताब्यात घेतले.
तपासावेळी, आदेश भैसे याने सांगितले की, त्याने आणि सोनू सुनील भालेराव यांनी सुमारे एक महिना पूर्वी चोपडा येथून सागर नावाच्या व्यक्तीकडून २०,००० रुपयांमध्ये गावठी पिस्तूल घेतले होते.
पोलीस कॉन्स्टेबल गोपीचंद शेनफडू सोनवणे यांच्या फिर्यादीवरून वरणगाव पोलीस ठाण्यात गुन्हा दाखल करण्यात आला असून, पुढील तपास सहाय्यक फौजदार नागेंद्र सिताराम तायडे करीत आहेत.
टिप्पणी पोस्ट करा