शॉर्ट सर्किटमुळे लागलेल्या आगीत कापडी मंडप, डेकोरेशनचे साहित्य जळून खाक; लग्नसराईच्या काळात टेन्ट हाऊस मालकाला मोठा आर्थिक फटका
जळगाव अपडेट न्यूज, निखिल वाणी I शहरातील मास्टर कॉलनीतील आरमान टेन्ट हाऊसच्या गोडावूनला बुधवारी (२२ जानेवारी) दुपारी तीन वाजता भीषण आग लागली. या आगीत गोडावूनमधील सर्व कापडी मंडप, डेकोरेशनचे साहित्य, खुर्ची, टेबल, पातेले, पडदे आणि इतर महत्त्वाचे साहित्य जळून खाक झाले. प्रारंभिक माहितीनुसार, ही आग शॉर्ट सर्किटमुळे लागली असावी, असा अंदाज व्यक्त करण्यात येत आहे.
आगीचे तातडीने नियंत्रण करण्यासाठी महापालिकेच्या अग्निशमन विभागाच्या दोन बंब घटनास्थळी दाखल झाले. त्यांनी पाणी फेकून आग आटोक्यात आणली. तसेच, परिसरातील नागरिकांनी मदतीचा हात पुढे करत जळत असलेले साहित्य बाहेर काढून आग विझविण्याचा प्रयत्न केला.
आग लागल्याच्या वेळी टेन्ट हाऊसचे मालक अनिस शफी पिंजारी जेवणासाठी घरी गेले होते. त्यांना घरी जेवण करणाऱ्या दरम्यान गोडावूनमधून धूर निघत असल्याची माहिती मिळाली. ते तातडीने घटनास्थळी पोहचले आणि गोडावूनमधील साहित्य जळताना पाहिले. आग लागल्यामुळे अनिस पिंजारी यांचे सुमारे २५ ते ३० लाख रुपयांचे नुकसान झाले आहे, अशी माहिती त्यांच्या पुतण्याने दिली.
तंत्रज्ञानाच्या युगातही अनिस पिंजारी यांना या प्रकारात मोठा आर्थिक फटका बसला आहे. सद्या लग्नसराईचा हंगाम सुरू असल्यामुळे, त्यांनी गोडावूनमध्ये अनेक लग्न समारंभांसाठी सजावट व इतर साहित्याचे आयोजन केले होते. ऐन लग्नसराईच्या काळात त्यांचे टेन्ट हाऊसचे साहित्य जळून खाक होण्यामुळे त्यांना मोठा आर्थिक नुकसान सहन करावा लागणार आहे.या घटनेमुळे मास्टर कॉलनीतील नागरिकांत भीतीचे वातावरण आहे, तसेच संबंधित विभागाने आग लागण्याच्या कारणांची सखोल तपासणी सुरू केली आहे.
टिप्पणी पोस्ट करा