अपक्ष उमेदवार शेख अहमद यांनी सहानुभूती मिळवण्यासाठी स्वतःच्या घरावर गोळीबार घडवण्याचे रचले षडयंत्र, पोलिस अधीक्षक डॉ. महेश्वर रेड्डी व अन्य वरिष्ठ अधिकाऱ्यांच्या मार्गदर्शनाखाली तपास कार्यवाही
जळगाव अपडेट न्यूज, निखिल वाणी I जळगाव जिल्ह्यातील अपक्ष उमेदवार शेख अहमद शेख हुसेन गुलाम यांच्या घरावर 18 नोव्हेंबर रोजी पहाटे गोळीबार झाला होता, ज्यामुळे निवडणुकीच्या वातावरणात धाडसी घडामोडी घडल्या. मात्र, पोलिसांनी तपास सुरु केल्यानंतर धक्कादायक माहिती समोर आली आहे. अपक्ष उमेदवार शेख अहमद यांनी मतदारांची सहानुभूती मिळवण्यासाठी आपल्या भाचा, मुलगा, शालक आणि मित्रांसोबत मिळून स्वतःच्या घरावर गोळीबार घडवण्याचे षडयंत्र रचले होते.
तपासात अनेक उलटफेरामुळे पोलिसांनी तपास अधिक बारकाईने केला, ज्यामुळे यातील षडयंत्र उघडकीस आले. खबऱ्यांच्या माहितीवर आधारित पोलिसांनी आरोपींविरुद्ध कारवाई केली. या प्रकरणात इरफान अहमद मोहम्मद हुसेन, शेख अहमद शेख हुसेन, शेख शिबान फाईज अहमद हुसेन, मोहम्मद शफीक शेख अहमद उर्फ बाबा, आणि शेख उमर फारूक अहमद हुसेन यांच्यावर गुन्हा दाखल करण्यात आले आहेत. त्यापैकी मोहम्मद शफीक उर्फ बाबा आणि शेख उमर फारूक हे फरार आहेत, तर इतर आरोपींना स्थानिक गुन्हे शाखेने अटक केली आहे.
या प्रकारामुळे निवडणुकीच्या पारदर्शकतेवर गंभीर प्रश्नचिन्ह निर्माण झाले आहे. उमेदवारांची सहानुभूती मिळवण्यासाठी बनावट कृत्य करणाऱ्या व्यक्तींवर कडक कारवाई केली जावी, अशी मागणी करण्यात येत आहे. पोलिसांनी या प्रकरणाचा सखोल तपास करून दोषींवर कठोर कारवाई करावी, असे आवाहन करण्यात आले आहे.
तपासाच्या संदर्भात, एलसीबीचे तपास अधिकारी पीएसआय दत्तात्रय पोटे यांना पोलिस अधीक्षक डॉ. महेश्वर रेड्डी यांचे मार्गदर्शन मिळाल्याने तपासाला गती प्राप्त झाली आहे. तपासात समोर आले की, मोहम्मद शफीक शेख अहमद उर्फ बाबा यांनी गोळीबार केला होता, आणि त्याच्या साथीने शेख उमर फारूक हुसेन देखील फरार आहे. पोलिसांनी या गुन्ह्यातील बंदुकीसह इतर मुद्देमाल जप्त करण्यासाठी कारवाई सुरु ठेवली आहे. तपासात सहाय्य करणाऱ्या पोलीस अधिकाऱ्यांची यादी पुढीलप्रमाणे आहे: पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, डीवायएसपी संदीप गावित, एलसीबीचे पोलीस अधीक्षक बबन आव्हाड आणि तपास पथकातील पीएसआय दत्तात्रय पोटे, सफौ अतुल वंजारी, हेकॉ विजयसिंग पाटील, अक्रम शेख, रवि नरवाडे, राजेश मेंढे, जितेंद्र पाटील, विजय पाटील, ईश्वर पाटील, हरिलाल पाटील यांनी तपास केला आहे.
टिप्पणी पोस्ट करा