विक्रम कापडणे यांच्या कॅमेऱ्याची हिसकावणी, मेमरी कार्ड काढून घेणे आणि दमदाटी करण्याचा आरोप; जळगाव शहर पोलिसांत गुन्हा दाखल
जळगाव - जळगाव महानगरपालिकेचे सहाय्यक आयुक्त गणेश चाटे यांच्या विरोधात जळगाव शहर पोलीस ठाण्यात पत्रकार विक्रम कापडणे यांच्या कॅमेऱ्याची हिसकावणी, मेमरी कार्ड काढून घेणे, तसेच दमदाटी करण्याबाबत गुन्हा दाखल करण्यात आला आहे.
सविस्तर माहिती अशी की, पत्रकार विक्रम कापडणे हे जळगाव महानगरपालिकेच्या लेखा विभागाच्या बाहेर कॅमेऱ्याने शूटिंग करत असताना, सहाय्यक आयुक्त गणेश चाटे तेथे आले आणि त्यांनी विक्रम कापडणे यांचा कॅमेरा जबरदस्तीने हिसकावून घेतला. कॅमेरा एका कर्मचाऱ्याला देऊन त्यातील मेमरी कार्ड काढून घेतले. यानंतर, विक्रम कापडणे यांनी जळगाव शहर पोलीस ठाण्यात तक्रार दाखल केली असून तक्रार क्रमांक ७२३/२०२४ अंतर्गत, कायदेशीर कलम ११५ (२) नुसार सहाय्यक आयुक्त गणेश चाटे यांच्या विरोधात गुन्हा नोंदवला आहे.
विक्रम कापडणे यांनी सांगितले की, उच्च न्यायालयाच्या निर्णयानुसार, शासकीय कार्यालयात, विशेषतः सार्वजनिक हिताच्या दृष्टीने शूटिंग करणे कायदेशीर आहे. सहाय्यक आयुक्त गणेश चाटे यांना याबाबत माहिती दिल्यानंतरही त्यांनी अरेरावी केली आणि अधिकाराचा गैरवापर करत कॅमेरा काढून घेतला.
घटना घडताना, भांडारपाल आणि मनपातील काही कर्मचारी साक्षीदार म्हणून उपस्थित होते. उच्च न्यायालयाच्या विविध निकालांनुसार, शासकीय कार्यालयांमध्ये पारदर्शकता टिकवण्यासाठी आणि जनहिताच्या मुद्द्यांसाठी शूटिंग करण्यास मनाई नाही. अशा परिस्थितीत, शासकीय अधिकारी जर त्यांच्या पदाचा गैरवापर करत पत्रकारांना काम करण्यापासून रोखत असतील तर तो कायद्याचा भंग मानला जातो.
या प्रकरणावर पोलीस तपास सुरू आहे आणि सहाय्यक आयुक्त गणेश चाटे यांची भूमिका व प्रतिवाद काय आहे, यावर तपशील येणे अपेक्षित आहे. पत्रकार संघटनांकडून या घटनेचा निषेध करण्यात आला असून, अनेक पत्रकारांनी अशा घटनांचा विरोध केला आहे. त्यांनी आरोप केला आहे की, अशा घटनांमुळे पत्रकारांना त्यांच्या कामापासून रोखण्याचा प्रयत्न होतो.
सामाजिक कार्यकर्ते दीपक कुमार गुप्ता यांनी संबंधित अधिकाऱ्यांना शासकीय कार्यालयात शूटिंग करण्यास मनाई आहे का, असा प्रश्न विचारला. त्यावर संबंधित अधिकारी निरुत्तरित झाले, यावरून अधिकाऱ्यांना कायद्याचे ज्ञान किती आहे, हे दिसून येते. अखेरीस, गणेश चाटे यांनी पत्रकारांचा कॅमेरा परत केला. तथापि, कॅमेऱ्यातील महत्त्वाचे व्हिडिओ डिलीट झाले आहेत की नाही किंवा कॅमेराचे नुकसान झाले आहे का, हे कॅमेरा ऑपरेट करूनच स्पष्ट होईल.
टिप्पणी पोस्ट करा