पोलिसांच्या शिताफीने कारवाई: आरोपींनी चोरी केलेली रक्कम जप्त, चाळीसगाव रेल्वे स्थानकावरील घटना
जळगाव अपडेट न्यूज, निखिल वाणी I चाळीसगाव रेल्वे स्थानकावर एक महिला रेल्वे गाडीत चढत असताना, गर्दीचा फायदा घेत, तीन भामट्यांनी तिच्या पर्ससह अडीच लाख रुपये लंपास केले होते. यावर चाळीसगाव रेल्वे पोलिस स्थानकात गुन्हा दाखल करण्यात आला होता. रेल्वे पोलिसांनी शिताफीने तिघा भामट्यांना जेरबंद केले असून, त्यांच्या या कामगिरीचे सर्वत्र कौतूक होत आहे.
चाळीसगाव येथील शितल कैलास पाखले धुळे-मुंबई रेल्वेमध्ये चढत असताना, गर्दीचा फायदा घेऊन त्यांच्या खांद्यावर लटकवलेली लेडीस पर्ससह दोन लाख पन्नास हजार रुपये, आधार कार्ड, पॅन कार्ड व मोटरसायकलची चावी चोरीला गेली. या घटनेवरून लोहमार्ग पोलिस ठाणे चाळीसगाव येथे गुन्हा दाखल करण्यात आला होता.
या गुन्ह्यात सीसीटीव्ही फुटेज आणि गुप्त बातमीदाराकडून मिळालेल्या माहितीच्या आधारे लोहमार्ग पोलिस ठाणे चाळीसगाव येथील पोलिस उपनिरीक्षक सुधाकर मोहिते, श्रेणी पीएसआय अनंत रेणुके, पो.ना पंकज पाटील, मोसिन अली सय्यद, फरीद तडवी यांनी रेल्वे सुरक्षा बल चाळीसगाव येथील टीम-पी.डी. पाटील उपनिरीक्षक, किशोर चौधरी, आरक्षक रेहान अहमद, गोविंद राठोड यांच्याशी समन्वय साधून संशयित आरोपींचा शोध घेतला.
पोलिस अधीक्षक स्वाती भोर, उप विभागीय पोलिस अधिकारी सूर्यकांत बांगर, प्रभारी अधिकारी सुरेश भाले, रेल्वे सुरक्षा बल अधिकारी चित्रेश जोशी, विभागीय सुरक्षा आयुक्त राजेशकुमार केसरी मनमाड, निरीक्षक अतुल टोके यांच्या मार्गदर्शनाखाली ही कारवाई करण्यात आली.
संशयित आरोपी अर्जुन उर्फ गोल्ट्या कानिफनाथ भोसले (वय २५), अक्षय बाळासाहेब नन्नावरे (वय २३), आणि विधीसंघर्षग्रस्त बालक यांना ताब्यात घेतले. त्यांच्यापासून चोरीस गेलेली २ लाख १९ हजार रुपये रोख रक्कम जप्त करण्यात आली आहे. संशयित आरोपींना अटक करण्यात आली असून विधीसंघर्षग्रस्त बालक याला समजपत्र देऊन ताब्यात घेतले आहे. पुढील तपास पोलिस करत आहेत.
टिप्पणी पोस्ट करा