जळगाव अपडेट न्यूज, निखिल वाणी I पिंप्राळा शिवारात अवैध वाळू वाहतूक करणारा ट्रॅक्टर थांबविण्याचा प्रयत्न करणाऱ्या ग्राम महसूल अधिकाऱ्यावर तिघांनी मिळून केलेल्या हल्ल्याची गंभीर घटना शनिवारी पहाटे घडली. या प्रकरणी अधिकारी राजू कडू बार्हे (वय ५३, रा. श्रीधर नगर, रामानंदनगर) यांनी रामानंदनगर पोलिसात तक्रार दाखल केली आहे.
घटना कशी घडली?
राजू बार्हे हे पिंप्राळा येथे दीड वर्षांपासून ग्राम महसूल अधिकारी म्हणून कार्यरत आहेत. १ डिसेंबर रोजी पहाटे ३.३४ वाजता ते खंडेरावनगर परिसरातून जात असताना निळ्या ‘स्वराज’ ट्रॅक्टरवर वाळू भरलेली दिसली. परवान्याबाबत विचारणा केली असता चालक गोंधळलेला दिसला.
तेवढ्यात काळ्या बजाज मोटारसायकलवरून मनोज रमेश भालेराव (पूर्वी वाळू प्रकरणात अडकलेला) आणि त्याचा साथीदार फैजल खान तेथे आले. “ट्रॅक्टर माझे आहे, आधीही पकडला होतास,” म्हणत मनोजने वाद घातला आणि चालकाला ट्रॅक्टर घेऊन जाण्यास सांगितले.
कॉलर पकडून मारहाण व शिवीगाळ
वाद चिघळताच मनोज भालेरावने अधिकाऱ्याच्या शर्टाची कॉलर पकडून डाव्या गालावर चापट मारली व ढकलून शिवीगाळ केली. मनोजच्या सांगण्यावरून फैजल खानने हातातील लोखंडी टॅमीने मारण्यासाठी झेप घेतली. अधिकारी बाजूला झाल्याने अनर्थ टळला. दरम्यान, ‘बुवा’ नावाचा ट्रॅक्टर चालक ट्रॅक्टर पळवून नेण्यात यशस्वी झाला.
लोकांच्या मदतीने आरोपी पसार
अधिकारी सहाय्यकांना फोन करताच परिसरातील नागरिक जमले. गर्दी पाहून मनोज आणि फैजल मोटारसायकलवरून फरार झाले.
मनोज भालेराव, फैजल खान आणि ट्रॅक्टर चालक बुवा (पूर्ण माहिती अज्ञात) यांच्यावर सरकारी कामात अडथळा, मारहाण, धमकी, अवैध वाळू वाहतूक अशा कलमांनुसार गुन्हा दाखल करण्यात आला आहे. पुढील तपास रामानंदनगर पोलिसांकडे आहे.
जिल्हाधिकारी-प्रांताधिकारी कडक कारवाई करणार का?
महसूल अधिकारी निवडणूक कामात व्यस्त असताना वाळूमाफियांचे हौसले वाढले आहेत. धामणगावात ट्रॅक्टर पकडला, तर जळगावात अधिकाऱ्यावर थेट हल्ला झाला. यामुळे जिल्हाधिकारी रोहन घुगे व प्रांताधिकारी विनय गोसावी यांनी एमपीडीए, तडीपार किंवा प्रतिबंधात्मक कारवाई सुरू करणार का, याची चर्चा सुरू झाली आहे.
टिप्पणी पोस्ट करा