जळगाव अपडेट न्यूज, निखिल वाणी I शहरातील एमआयडीसी पोलीस स्टेशनने तात्काळ आणि प्रभावी कारवाई करत मोटारसायकलच्या डिक्कीतून ८३ हजार रुपयांची रोकड चोरणाऱ्या तीन आरोपींना अटक केली आहे. पोलिसांनी आरोपींकडून चोरीस गेलेली संपूर्ण रोख रक्कम जप्त केली असून, ही कारवाई कौतुकास्पद ठरली आहे.
रामेश्वर कॉलनी परिसरात राहणाऱ्या फिर्यादी यांनी दि. १० डिसेंबर २०२५ रोजी रात्री आपली दुचाकी (ॲक्टिव्हा मोपेड) शेरा चौकातील भूमी हॉटेलजवळील एका मेडिकल दुकानासमोर लावली होती. दिवसभरात दुकानात जमा झालेले ८३,००० रुपये प्लास्टिकच्या पिशवीत ठेवून त्यांनी दुचाकीच्या डिक्कीत ठेवले होते. औषध खरेदीसाठी ते मेडिकलमध्ये गेले असता, अज्ञात चोरट्यांनी संधी साधून दुचाकीचा डिक्की उघडून संपूर्ण रक्कम चोरून नेली. याप्रकरणी एमआयडीसी पोलीस स्टेशनमध्ये गुन्हा दाखल करण्यात आला होता.
गुन्हा दाखल होताच एमआयडीसी पोलीस स्टेशनच्या गुन्हे शोध पथकाने तपासाची सूत्रे हाती घेतली. गुप्त बातमीदारांकडून माहिती घेत परिसरातील सीसीटीव्ही फुटेजचे बारकाईने निरीक्षण करण्यात आले. या तपासातून आरोपींची ओळख पटली. त्यानुसार दि. १२ डिसेंबर २०२५ रोजी पोलिसांनी जळगाव शहरातील दत्त नगर परिसरात सापळा रचून तिन्ही आरोपींना ताब्यात घेतले. चौकशीत त्यांनी गुन्ह्याची कबुली दिली.
अटक करण्यात आलेल्या आरोपींची नावे
रुषीकेश अजय तेली (रा. दत्त नगर, मेहरुण, जळगाव),
रोहित गुरुदयाल बघेल (रा. दत्त नगर, मेहरुण, जळगाव),
अनुज ईश्वर सोनवणे (रा. दत्त नगर, मेहरुण, जळगाव)
अशी असून, त्यांच्याकडून चोरीस गेलेली संपूर्ण ८३,००० रुपये रोख रक्कम जप्त करण्यात आली आहे.
जळगाव पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते व उपविभागीय पोलीस अधिकारी नितीन गणापुरे यांच्या मार्गदर्शनाखाली ही कारवाई करण्यात आली.
एमआयडीसी पोलीस स्टेशनचे पोलीस निरीक्षक बबन आव्हाड यांच्या सूचनेनुसार गुन्हे शोध पथकातील पोलीस उपनिरीक्षक राहुल तायडे, पोलीस उपनिरीक्षक चंद्रकांत धनके, तसेच सफौ विजयसिंग पाटील, पोह गणेश शिरसाळे, पोह प्रमोद लाडवंजारी, पोकों नितीन ठाकुर, पोकों किरण पाटील, पोकॉ गणेश ठाकरे, पोकों राहुल घेटे व पोकॉ नरेंद्र मोरे यांनी ही यशस्वी कामगिरी बजावली.
टिप्पणी पोस्ट करा