जळगाव अपडेट न्यूज, निखिल वाणी I भारतीय अंतराळ संशोधन संस्था (इस्रो) आणि अणुऊर्जा विभाग यांच्या संयुक्त संशोधन मोहिमेअंतर्गत उच्च उंचीवर जाणाऱ्या वैज्ञानिक बलून उड्डाणांची मालिका राबविण्यात येत आहे. हे प्रयोग टाटा इन्स्टिट्यूट ऑफ फंडामेंटल रिसर्च (TIFR) आणि ईसीआयएल, हैदराबाद यांच्या बलून सुविधा केंद्रातून करण्यात येणार आहेत.
ही उड्डाणे २५ ऑक्टोबर ते ३१ डिसेंबर २०२५ दरम्यान होणार असून, एकूण सुमारे १० उड्डाणे नियोजित आहेत. या बलूनचा व्यास ५० ते ८५ मीटर इतका असून, त्यात हायड्रोजन वायू भरला जातो. हे बलून ३० ते ४२ किलोमीटर उंचीवर जाऊन विविध वैज्ञानिक उपकरणांच्या साहाय्याने माहिती संकलित करतात. प्रयोग संपल्यानंतर ही उपकरणे रंगीत पॅराशूटच्या मदतीने जमिनीवर उतरवली जातात.
वाऱ्याच्या दिशेनुसार ही उपकरणे हैदराबादपासून २०० ते ३५० किलोमीटर अंतरावर पडू शकतात. त्यामुळे जळगाव, औरंगाबाद, नांदेड, बीड, परभणी, अहमदनगर, सोलापूर, सांगली, सातारा, वर्धा, नागपूर, चंद्रपूर आणि गडचिरोली या जिल्ह्यांत उपकरणे पडण्याची शक्यता व्यक्त करण्यात आली आहे.
नागरिकांसाठी सूचना
एखादे पॅराशूट किंवा उपकरण आढळल्यास त्याला स्पर्श, हालचाल किंवा उघडण्याचा प्रयत्न करू नका.
काही उपकरणांमध्ये उच्च दाबाचा विद्युत प्रवाह असू शकतो.
वैज्ञानिक माहिती सुरक्षित ठेवण्यासाठी उपकरणे जशी आहेत तशीच ठेवावीत.
अशी वस्तू आढळल्यास काय करावे?
लगेच जवळच्या पोलिस ठाणे, जिल्हा प्रशासन किंवा पोस्ट ऑफिस येथे कळवावे.
तसेच TIFR बलून सुविधा केंद्र, ईसीआयएल, हैदराबाद येथे संपर्क साधावा.
बक्षिसाची संधी
उपकरणांची सुरक्षित परतफेड करणाऱ्या नागरिकांना बक्षीस आणि खर्चाची भरपाई देण्यात येईल. मात्र, उपकरणे खराब किंवा छेडछाड झाल्यास बक्षीस दिले जाणार नाही, असे स्पष्ट करण्यात आले आहे.
गावपातळीपर्यंत ही माहिती पोहोचवून जनजागृती करण्याचे आवाहन संबंधित विभागांनी केले आहे.
टिप्पणी पोस्ट करा