Big Breaking I जळगावात गोळीबार, दोन कामगार गंभीर जखमी

कर्णधार धनश्री कोळी व रायडर यज्ञा कोळी यांच्या दमदार खेळीने संघाने पटकावला जिल्हा विजेतेपद

जळगाव अपडेट न्यूज, निखिल वाणी I महाराष्ट्र राज्य क्रीडा व युवक सेवा संचालनालयांतर्गत जिल्हा क्रीडा अधिकारी कार्यालय व जळगाव जिल्हा कबड्डी असोसिएशन यांच्या संयुक्त विद्यमाने आयोजित जिल्हास्तरीय शालेय ग्रामीण १४ वर्षे वयोगटातील मुलींची कबड्डी स्पर्धा आज जिल्हा क्रीडा संकुल, जळगाव येथे उत्साहात पार पडली.

या स्पर्धेत जिल्ह्यातील विविध तालुक्यांमधील संघांनी सहभाग नोंदविला. अंतिम सामन्यात जळगाव तालुक्यातील विदगाव येथील अ. म. वारके विद्यालयाचा संघ आणि पाचोरा तालुक्याचा संघ यांच्यात थरारक लढत रंगली. सामन्याच्या सुरुवातीपासूनच वारके विद्यालयाच्या खेळाडूंनी जबरदस्त बचाव आणि चपळ चढाया करत आघाडी घेतली. अखेरच्या क्षणापर्यंत सामन्यात रंगत राखत वारके विद्यालयाने ३७–२२ अशा १५ गुणांच्या फरकाने पाचोरा संघावर मात करत जिल्हा विजेतेपद मिळवले.

संघाच्या विजयात कर्णधार धनश्री विश्वास कोळी हिने उत्तम नेतृत्व करत संघ एकत्र ठेवला, तर रायडर यज्ञा लखीचंद कोळी हिने आपल्या वेगवान आणि अचूक चढायांनी प्रेक्षकांची दाद मिळवली. संपूर्ण संघाचे प्रशिक्षण आणि मार्गदर्शन क्रीडा शिक्षिका डॉ. सौ. कांचन विसपुते यांनी केले.

या उल्लेखनीय कामगिरीबद्दल संस्थेचे अध्यक्ष प्रा. डॉ. प्रशांत वारके, उपाध्यक्ष सतीश महाजन, सचिव विकास वारके, तसेच शाळेचे मुख्याध्यापक राजेंद्र न्याळोदे यांनी विजयी संघाचे अभिनंदन केले. विद्यालयातील सर्व शिक्षकवृंद आणि शिक्षकेत्तर कर्मचारी यांच्याकडूनही खेळाडूंवर कौतुकाचा वर्षाव करण्यात आला.

या विजयामुळे वारके विद्यालयाच्या विद्यार्थिनींनी केवळ शाळेचेच नव्हे, तर जळगाव तालुक्याचे नावही जिल्हा पातळीवर उज्ज्वल केले आहे. आगामी विभागीय स्तरावरील स्पर्धेसाठी आता या संघाकडून अधिक चमकदार कामगिरीची अपेक्षा व्यक्त केली जात आहे.