जळगाव अपडेट न्यूज, निखिल वाणी I
जळगाव-चोपडा मार्गावरील तापी नदीवरील विदगाव पुलावर काल (मंगळवारी) मध्यरात्रीच्या सुमारास अवैध वाळू वाहतूक करणाऱ्या भरधाव डंपरने कारला जोरदार धडक दिली. या भीषण अपघातात आई व मुलाचा जागीच मृत्यू झाला असून, वडील आणि दुसरा मुलगा गंभीर जखमी झाले आहेत. या घटनेने परिसरात मोठी खळबळ उडाली आहे.
घटनेत विठ्ठल नगर येथील मीनाक्षी निलेश चौधरी (वय अंदाजे ३५) आणि त्यांचा मुलगा पार्थ (वय ७) यांचा जागीच मृत्यू झाला. तर मीनाक्षी यांचे पती निलेश प्रभाकर चौधरी आणि दुसरा मुलगा ध्रुव गंभीर जखमी झाले असून त्यांच्यावर जिल्हा रुग्णालयात उपचार सुरू आहेत.
अपघात इतका भीषण होता की डंपरच्या जोरदार धडकेने चौधरी कुटुंबीयांची कार थेट पुलावरून खाली फेकली जाऊन नदीपात्रातील वाळूत कोसळली. चौधरी कुटुंब चोपडा येथे जात असताना हा अपघात घडला. निलेश चौधरी हे धानोरा येथील शिक्षक असून, मीनाक्षी चौधरी जळगाव शहरात शिक्षिका म्हणून कार्यरत होत्या. त्यांच्या अकाली निधनामुळे शैक्षणिक वर्तुळासह समाजात हळहळ व्यक्त केली जात आहे.
अपघाताची माहिती मिळताच यावल पोलीस ठाण्याचे निरीक्षक संजय गायकवाड यांच्यासह पोलिसांनी घटनास्थळी धाव घेतली. जखमींना तत्काळ जिल्हा रुग्णालयात हलवण्यात आले. दरम्यान, डंपर चालकाविरुद्ध गुन्हा दाखल करण्याची प्रक्रिया सुरू असल्याचे पोलिसांनी सांगितले.
दरम्यान, जिल्ह्यातील अवैध वाळू वाहतूक करणाऱ्या डंपरमुळे अपघातांचे प्रमाण दिवसेंदिवस वाढत आहे. निष्पाप नागरिकांना आपले प्राण गमवावे लागत असून, प्रशासनाने याकडे गांभीर्याने लक्ष घालून अशा बेकायदेशीर वाहतुकीला आळा घालावा, अशी नागरिकांकडून जोरदार मागणी केली जात आहे.
टिप्पणी पोस्ट करा