जळगाव अपडेट न्यूज, निखिल वाणी I शहर आज एका भीषण अपघाताने हादरले. बुधवारी पहाटे निमखेडी शिवारात एका अवजड वाहनाने धडक दिल्याने दोन सख्खे भाऊ जागीच ठार झाले. या घटनेमुळे शिवदे कुटुंबावर दु:खाचा डोंगर कोसळला आहे.
मृतांमध्ये शिवसेना (शिंदे गट) महिला शहर प्रमुख ज्योती शिवदे यांचे पती ज्ञानेश्वर झगडू शिवदे आणि त्यांचे दीर प्रमोद दगडू शिवदे यांचा समावेश आहे.
मिळालेल्या माहितीनुसार, ज्ञानेश्वर आणि प्रमोद हे दोघे पाणीपुरी विक्रीचा व्यवसाय करत होते. नेहमीप्रमाणे पाणीपुरीचा माल तयार करण्यासाठी ते शिवाजीनगर येथील त्यांच्या जुन्या घरी जात असताना, निमखेडी येथील कांताई नेत्रालयाजवळ एका अज्ञात वाहनाने त्यांच्या रिक्षाला जोरदार धडक दिली. ही धडक इतकी भीषण होती की दोघांचाही जागीच मृत्यू झाला.
अपघातानंतर अज्ञात वाहन चालक घटनास्थळावरून फरार झाला. मृतदेह शासकीय वैद्यकीय महाविद्यालय व रुग्णालयात उत्तरीय तपासणीसाठी नेण्यात आले. या दुःखद घटनेची माहिती मिळताच, त्यांचे नातेवाईक, शिवसेनेच्या (शिंदे गट) कार्यकर्त्यांसह विविध राजकीय पक्षांच्या कार्यकर्त्यांनी रुग्णालयात मोठी गर्दी केली होती. रुग्णालयात प्रचंड आक्रोश पाहायला मिळाला.
जळगाव तालुका पोलीस स्टेशनमध्ये या प्रकरणी गुन्हा दाखल करण्याचे काम सुरू आहे. पोलीस धडक देणाऱ्या वाहनाचा तपास करण्यासाठी सीसीटीव्ही फुटेज तपासत आहेत. एकाच अपघातात दोन सख्ख्या भावांचा अकाली मृत्यू झाल्याने सर्वत्र हळहळ व्यक्त होत आहे.
टिप्पणी पोस्ट करा