जखमींच्या नातेवाईकांना दिला मानसिक आधार, मृतांच्या कुटुंबीयांप्रती सहवेदना व्यक्त
जळगाव अपडेट न्यूज, निखिल वाणी I जळगाव अपडेट न्यूज, निखिल वाणी I काल झालेल्या रेल्वे दुर्घटनेतील जखमींची केंद्रीय क्रीडा व युवक कल्याण राज्यमंत्री रक्षा खडसे यांनी गोदावरी हॉस्पिटलमध्ये भेट घेऊन आस्थेने चौकशी केली. त्यांनी जखमींना दिलासा देत, "काळजी करू नका, शासनाकडून सर्व प्रकारची मदत केली जात आहे. जखमी लवकरच बरे होतील," असे सांगून त्यांच्याबद्दल सदिच्छा व्यक्त केल्या.
जखमींच्या नातेवाईकांना भेटून राज्यमंत्री खडसे यांनी त्यांना मानसिक आधार देण्याचा प्रयत्न केला. या घटनेबद्दल त्यांचा कळवळा आणि सहवेदना व्यक्त केली. यावेळी जिल्हाधिकारी आयुष प्रसाद, गोदावरी फाउंडेशनच्या डॉ. केतकी पाटील, तहसीलदार नीता लबडे, सह-जिल्हा शल्यचिकित्सक आकाश चौधरी आणि गोदावरी हॉस्पिटलचे डॉक्टर व पदाधिकारी उपस्थित होते.
केंद्रीय राज्यमंत्री खडसे यांच्या भेटीदरम्यान डॉ. केतकी पाटील यांनी जखमींच्या आरोग्याच्या स्थितीबद्दल माहिती दिली आणि सर्व जखमींवर योग्य उपचार सुरू असल्याचे सांगितले.
काल झालेल्या दुर्घटनेत जखमी झालेल्या व्यक्तींना सुरुवातीला पाचोरा येथील वृंदावन हॉस्पिटल आणि विघ्नहर्ता रुग्णालयात उपचार देण्यात आले होते. नंतर सर्व नऊ जखमींना गोदावरी हॉस्पिटलमध्ये हलवण्यात आले आहे.
तसेच, जिल्हाधिकारी आयुष प्रसाद यांनी रेल्वे दुर्घटनेबाबत सविस्तर माहिती केंद्रीय राज्यमंत्री खडसे यांना दिली. खडसे यांनी या दुर्घटनेत मृत झालेल्या व्यक्तींच्या कुटुंबीयांप्रती सहवेदना व्यक्त करत त्यांच्या दु:खात सहभागी होण्याची भावना व्यक्त केली.
रेल्वे दुर्घटना हे एक दुर्दैवी घटित असून, संबंधित यंत्रणा घटनास्थळी तत्परतेने काम करत आहेत आणि जखमींच्या उपचारासाठी सर्व आवश्यक सुविधा उपलब्ध करून देण्यात आल्या आहेत.
टिप्पणी पोस्ट करा