विधानसभा सार्वत्रिक निवडणुकीसाठी २० नोव्हेंबर रोजी सुट्टी जाहीर, परिपत्रक जारी
जळगाव अपडेट न्यूज निखिल वाणी I भारत निवडणूक आयोगाने १५ ऑक्टोबर रोजी महाराष्ट्र राज्यातील विधानसभा सार्वत्रिक निवडणूक २०२४ चा कार्यक्रम जाहीर केला आहे. त्यानुसार, २० नोव्हेंबर २०२४ रोजी महाराष्ट्र विधानसभा निवडणूकीचे मतदान पार पडणार आहे. मतदानाचा हक्क अधिकाधिक नागरिकांना बजावता यावा, यासाठी २० नोव्हेंबर रोजी राज्यभर सार्वजनिक सुट्टी जाहीर करण्यात आली आहे.
कार्यसन अधिकारी शामकांत सोनवणे यांनी एका परित्रकाद्वारे सूचित केले आहे की, विधानसभा मतदारसंघातील सर्व मतदारांना मतदान करण्यासाठी सुट्टी दिली जाईल. यामध्ये कोणत्याही व्यवसाय, उद्योग, व्यापार किंवा अन्य आस्थापनेतील कर्मचारी, कामगार, अधिकारी यांचा समावेश आहे. मतदानासाठी सुट्टी घेतल्याने कोणत्याही कर्मचाऱ्याच्या वेतनात कपात केली जाणार नाही.
येत्या निवडणुकीच्या दिवशी, जर एखाद्या नियोक्त्याने या नियमांचे उल्लंघन केले, तर तो निवडणूक आयोगाच्या नियमानुसार योग्य शिक्षेस पात्र ठरेल. मात्र, जर रोजगाराच्या संदर्भात धोका निर्माण होईल अथवा मोठ्या प्रमाणात नुकसान होईल, तर संबंधित मतदारावर हे कलम लागू होणार नाही. अशा परिस्थितीत, कामकाजी लोकांना मतदानासाठी कमीत कमी दोन तासांची सवलत मिळवता येईल, यासाठी संबंधित जिल्हाधिकारी किंवा जिल्हा निवडणूक अधिकारी यांची पूर्व परवानगी आवश्यक असणार आहे.
संपूर्ण प्रक्रिया पारदर्शक आणि व्यवस्थित होण्यासाठी मतदानाच्या दिवशी मतदान न करणाऱ्यांविरुद्ध योग्य कारवाई करण्यात येईल, असे निवडणूक आयोगाने स्पष्ट केले आहे.
टिप्पणी पोस्ट करा