एमआयडीसी पोलिस ठाण्यात चौघांविरोधात गुन्हा दाखल
जळगाव अपडेट न्यूज, निखिल वाणी I वाहनाला कट का मारला, असा जाब विचारल्याच्या कारणावरून चौघांनी मिळून एका तरुणावर धारदार शस्त्राने वार करत बेदम मारहाण केल्याची घटना २२ डिसेंबर रोजी वावडदा (ता. पाचोरा) परिसरात घडली आहे. या प्रकरणी एमआयडीसी पोलीस ठाण्यात चौघांविरुद्ध गुन्हा दाखल करण्यात आला आहे.
पाचोरा तालुक्यातील दहिगाव येथील रहिवासी व शासकीय कंत्राटदार असलेले लोकेश धनसिंग पाटील (वय २६) हे २२ डिसेंबर रोजी रात्री साडेअकरा वाजेच्या सुमारास वावडदा गावाजवळून जात असताना त्यांच्या वाहनाला एका चारचाकी वाहनाने कट मारला. याचा जाब विचारल्याने संतप्त झालेल्या चारचाकीतील व्यक्तींनी लोकेश पाटील यांच्यावर हल्ला चढवला.
हल्लेखोरांनी धारदार शस्त्राने वार करत लोखंडी रॉडने मारहाण केली, ज्यात लोकेश पाटील गंभीर जखमी झाले. त्यांना तातडीने रुग्णालयात दाखल करण्यात आले. उपचारानंतर त्यांनी एमआयडीसी पोलीस ठाण्यात तक्रार दिली.
त्यानुसार बंटी उर्फ दीपक पाटील, हरिष पाटील (दोघे रा. रायसोनी नगर, जळगाव) व करण पाटील (रा. जळगाव) यांच्याविरोधात गुन्हा दाखल करण्यात आला आहे. पुढील तपास पोहेकॉ समाधान टहाकळे करीत आहेत.
टिप्पणी पोस्ट करा