PMJVK अंतर्गत जळगावातील प्रस्तावाला वेग, मनसेचे अभियंता सोनवणे यांना निवेदन
जळगाव अपडेट न्यूज निखिल वाणी I प्रधानमंत्री जन विकास कार्यक्रम (PMJVK) अंतर्गत जळगाव जिल्ह्यात संविधान भवन उभारण्याची मागणी करण्यात आली आहे. या संदर्भात महाराष्ट्र नवनिर्माण सेनेचे उपमहानगराध्यक्ष आशिष उत्तमराव सपकाळे आणि गौतमी महिला बहुउद्देशीय संस्थेच्या पदाधिकाऱ्यांनी सार्वजनिक बांधकाम विभागाचे अधीक्षक अभियंता श्री. प्रशांत सोनवणे यांना निवेदन दिले आहे.
निवेदनात जळगाव उपनगरातील पिंप्राळा हुडको येथे 7 एकर जागेवर डॉ. बाबासाहेब आंबेडकरांच्या दीक्षाभूमी नागपूरची प्रतिकृती म्हणून 'संविधान भवन' उभारण्याची मागणी करण्यात आली आहे. या भागातील नागरिकांची मागणी अनेक वर्षांपासून प्रलंबित असून, अल्पसंख्यांक तसेच SC/ST/OBC/NT समुदायाच्या मोठ्या प्रमाणात वस्तीमुळे PMJVK च्या निकषांनुसार या भागाची निवड करण्यात यावी, असे निवेदनात म्हटले आहे.
सर्व समाजासाठी उपयुक्त भवन
संविधान भवन उभारल्यास पिंप्राळा उपनगरातील खोटेनगर, दादावाडी, खंडेराव नगर, हरी विठ्ठल नगर, वाघ नगर यांसारख्या परिसरातील सर्व वस्तीला याचा फायदा होणार आहे. या परिसरात सुमारे 1,25,000 लोकसंख्या असून, विविध जाती व धर्मांचे लोक येथे वास्तव्यास आहेत.
विद्यार्थ्यांसाठी सुविधा
निवेदनात असेही नमूद करण्यात आले आहे की, प्रस्तावित संविधान भवनाच्या परिसरात विद्यापीठ, महाविद्यालये आणि शाळा असल्यामुळे विद्यार्थ्यांना देखील या भवनाचा मोठा लाभ होऊ शकतो. त्यामुळे पिंप्राळा हुडको येथेच संविधान भवन उभारावे, अशी मागणी मनसे व गौतमी महिला बहुउद्देशीय संस्थेने केली आहे.
निवेदनात सहभागी पदाधिकारी: गौतमी महिला बहुउद्देशीय संस्थेच्या अध्यक्ष संगिता मालेराव, उपाध्यक्ष सिंधुताई जाधव, सचिव ज्योती निकम, तसेच आशा सुरळके, राणी नन्नवरे, वंदना बागर, ऐयाती बाम्हणे, जयक्षी सपकाळे, मिना सोनवणे आणि अन्य सदस्यांनी या मागणीसाठी योगदान दिले आहे.
टिप्पणी पोस्ट करा